Azərbaycan banklarının yekun mənfəəti il ərzində 17,3% azalıb

Azərbaycanda fəaliyyət göstərən bankların ümumi gəlirləri 2012-ci ilin yanvar-sentyabrında 1173,31 mln manat olub. Bu, ötən ilin eyni dövründəkindən 132,53 mln manat və ya 12,7% çoxdur. Qeyri-faiz gəlirləri 18,2% artaraq 267,94 mln manat olub.

Hesabat dövründə bankların xərcləri 106,46 mln manat və ya 6,1% artaraq 912,66 mln manat təşkil edib. Aktivlər üzrə ehtiyat ayırmalar ötən ilin eyni dövrü ilə müqayisədə 42,52 mln manat və ya 36,8% artaraq 158,21 mln manat (aktivlər il ərzində 18% artıb) olub. 

 AMB-dən Turan-a verilən məlumata görə, bank gəlirlərinin strukturunda əsas hissə faiz gəlirlərinin – 77,2%, xərclərdə faiz ödəmələrinin (52,5%) payına düşüb. 

Vergi ödənilənə qədər bankların illik mənfəəti 103,36 mln manat olub. Bu, ötən ilin yanvar-sentyabrındakından 13% azdır. Bank sisteminin yekun mənfəəti il ərzində 17,3% azalaraq 90,18 mln manat olub. 

Doqquz ayda 33 bank rentabelli işləyib. Onların ümumi xalis mənfəəti 183,40 75 mln manat olub. 10 ziyanla işləyən bankın itkisi 93,57 mln manat təşkil edib. 2011-ci ilin eyni dövrü ilə müqayisədə mənfəətli bankların sayı 1 vahid artıb. Ziyanla işləyən bankların sayı 2 vahid azalıb, onların ümumi itkisi isə 4,8 dəfə artıb. --15В--