Azərbaycan BP ilə yeni PSA sazişi təsdiq edib

Milli Məclisin bugünkü iclasında "Xəzər dənizinin Azərbaycan sektorunda Abşeron yarımadası ətrafında dayazsulu sahənin kəşfiyyatı, işlənməsi və hasilatın pay bölgüsü haqqında" qanun layihəsi müzakirəyə çıxarılıb.

Milli Məclis sədrinin müavini Valeh Ələsgərov məlumat verib ki, saziş 3 mərhələni əhatə edəcək: ilkin kəşfiyyat, əsas kəşfiyyat, hasilat

Onun sözlərinə görə, kontrakt sahəsi 1,9 min kv km-dir. 50% BP-yə, 50% - SOCAR-a məxsusdur.

30 ay çəkəcək I mərhələdə BP 1 min kv km sahədə 3D seysmik kəşfiyyat aparacaq. BP bu dövrdə perspektiv struktur tapsa, dördədək belə struktur seçib əsas kəşfiyyata keçə bilər. Bu mərhələ 3 ilədək çəkə bilər.

Bu dövrdə BP mühəndis-geoloji kəşfiyyat aparmalı, bu işlərin ətraf mühitə təsiri barədə hesabat hazırlamalıdır. Əgər bu dövrdə podratçı kommersiya ehtiyatları tapsa, SOCAR-a məlumat verəcək və 6 aya bu yataqların işlənməsi üçün proqram hazırlamalıdır.

Ələsgərovun sözlərinə görə, podratçı şirkət tərəfindən təqdim olunmuş işlənmə və hasilat dövrü proqramı Dövlət Neft Şirkətinin təsdiqlədiyi tarixdən etibarən 23 il müddətinə təyin olunur. İşin gedişindən asılı olaraq, bu müddət uzadıla bilər. BP işlənmə başlanılandan 36 ay ərzində hasilata başlamalıdır.

BP həmçinin yerli kadrların təlimi üçün $200 ayıracaq.

Ələsgərov deyib ki, proses Dövlət Neft Şirkətinin nəzarəti və Azərbaycanın milli maraqlarının qorunması şəraitində aparılacaq.

Sazişin təsdiqi barədə qanuna əsasən, iştirakçılar zəruri lisenziya, gömrük icazəsi, viza və s ilə təmin edilir.

Ələsgərov deyib ki, bu cür sazişlər Azərbaycanın uğurlu neft strategiyasının davam etdirildiyini göstərir.

PSA-sazişin əhatə etdiyi ərazi Abşeronun cənub hissəsini əhatə edir. Burda dənizin dəirnliyi 40 metr, potensial məhsuldar layın dərinliyi 3-5 min metrdir.–12C--