Azərbaycan hələ də Xəzər qazının Avropaya tankerlə nəqlinə inanır

Azərbaycan gələcəkdə öz qazının Avropaya tankerlə ixrac ediləcəyini istisna etmir. Belə versiyanı bazar ertəsi jurnalistlərlə söhbətində Azərbaycan Dövlət Neft Şirkətinin prezidenti Rövnəq Abdullayev səsləndirib.

SOCAR rəhbəri bəyan edib ki, gələcəkdə Azerbaijan-Georgia-Romania Interconnection (AGRI) layihəsinin reallaşdırılmasını istisna etmir.

“Bütün layihələrin yaşamaq haqqı var. Azərbaycan böyük qaz ehtiyatlarına malikdir və indi xüsusilə “Abşeron” yatağında yeni işlər aparılır, BP ilə birgə perspektivli “Şəfəq-Asiman” strukturunun işlənilməsinə hazırlıq gedir. Həmçinin “Ümid-Babək” blokunun işlənilməsi üçün işlər aparılır. Qaz ehtiyatları çoxdur və onların bazara çıxarılması üçün infrastruktur lazımdır,  bu nöqteyi nəzərdən AGRI layihəsi də gələcəkdə reallaşdırılacaq”, - deyə Abdullayev izah edib.

Ancaq SOCAR rəhbəri qeyd edib ki, ilk növbədə artıq reallaşdırılmasına başlanılmış “Cənub qaz dəhlizi” layihəsidir və “onun genişlənməsi üçün böyük imkan var”.

“Əgər zərurət yaransa, həmçinin bazardakı situasiyadan asılı olaraq biz AGRI layihəsinə qayıda bilərik”, - deyə R.Abdullayev qeyd edib.

AGRI layihəsinin səhmdarları 2011-ci ildə AGRI LNG Co-i təsis edən Azərbaycanın SOCAR, Gürcüstanın COGC, Rumıniyanın Romgaz və Macarıstanın MVM şirkətləridir. Bu şirkətlərin hər birinin AGRI LNG Co-a payı 25% təşkil edir. AGRI direktorlar şurasının sədri SOCAR-dı. Bu layihənin mahiyyəti Azərbaycan qazının Gürcüstanın Kulevi terminalından rumıniyanın Konstansa limanına çatdırılmasıdır. Layihənin ilkin variantı onun istisadi cəhətdən qeyri-rentabelliyini göstərdi.–12В--