Azərbaycan ixrac edilən neftin ekspertizası üçün vahid tarif tətbiq edib

Tarif Şurasının qərarına əsasən, 2013-cü il mayın 1-dən ixrac edilən neftin mənşəyi olan ölkənin müəyyən edilməsi üzrə ekspertizaya görə vahid tarif qüvvəyə minir, deyə TŞ-nin rəsmi saytında yerləşdirilən məlumatda bildirilir. 

"İxrac olunan xam neftin mənşə ölkəsinin müəyyən edilməsi üzrə ekspertizanın keçirilməsi ilə bağlı göstərilən xidmətlərin dəyəri ixrac olunan məhsulun həcminə görə deyil, hər bir sertifikat üzrə sabit qiymət müəyyənləşdirilib. – deyə qərarda bildirilir. 

İxrac edilən neftin həcmindən asılı omayaraq, bir ekspertizanın xərci 2,300 manat olacaq. 

“Azərbaycan Respublikasının İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin tabeliyində olan İstehlak Mallarının Ekspertizası Bürosu tərəfindən göstərilən xidmətlərin tariflərinin tənzimlənməsi barədə” Azərbaycan Respublikası Tarif Şurasının 24 noyabr 2011-ci il tarixli qərarına əsasən, bir ton neftin ekspertiza qiyməti 0,04 manatdır. 

Digər enerji resurslarının ekspertiza tarifləri dəyişməz qalıb: bir ton neft məhsulunun ekspertiza tarifi 0,10 manat, 1 mln m3 qazın ekspertizası 280 manat, 1 mln kvt/saat elektrik enerjisinin ekspertizası 225 manatdır. --0—