Azərbaycan səmərəli əməkdaşlıq üçün mədən hüquqlarını AzerGold-a ötürür

Milli Məclis tərəfindən ratifikasiya olunan və Prezident İlham Əliyev tərəfindən 21 iyun 2024-cü ildə təsdiq edilən Qanuna əsasən, qızıl, mis və polimetal perspektiv filiz yataqlarının kəşfiyyatı, işlənməsi və hasilatın pay bölgüsü haqqında Sazişin həyata keçirilməsində dövləti təmsil etmək səlahiyyəti “AzerGold” QSC-yə ötürülüb. Bu saziş Gədəbəy, Qoşa, Xarxar, Qaradağ, Ordubad qrupu (Piyazbaşı, Ağyurd, Şəkərdərə, Kələki), Qızılbulaq, Dəmirli və Vejnəli yataqlarını əhatə edir və Azərbaycan Respublikasının Ekologiya və Təbii Sərvətlər Nazirliyi ilə Amerika Birləşmiş Ştatlarının “R.V. Investment Group Services, LLC” arasında imzalanıb.

Bu ötürülmənin əsas məqsədi, “R.V. Investment Group Services, LLC” ilə mədən sahəsində ixtisaslaşmış dövlət şirkəti olan “AzerGold” QSC arasında səmərəli əməkdaşlığın təmin edilməsidir. Sazişin şərtlərinə əsasən, “AzerGold” QSC “R.V. Investment Group Services, LLC”yə hüquqlar və mənafelər vermək, fəaliyyətin səmərəli təşkil edilməsini nəzarət etmək, hökumət orqanları ilə əməkdaşlığı təmin etmək və digər öhdəlikləri daşıyır.

Saziş çərçivəsində fəaliyyətin əhatə dairəsinə mədənlərin idarə olunması, geoloji kəşfiyyat, hasilat, istehsalat, ətraf mühitin mühafizəsi, yerli icmalarla iş və korporativ sosial məsuliyyət daxildir. Bu fəaliyyətlər “AzerGold” QSC-nin nəzarəti altında “R.V. Investment Group Services, LLC” tərəfindən həyata keçiriləcək. “AzerGold” operator şirkətin mədən fəaliyyəti yerli və beynəlxalq qanunvericiliyin tələblərinə uyğun şəkildə yerinə yetirilməsini təmin edəcək.

Sazişdən irəli gələn məsələlərin həlli və fəaliyyətin operativ təşkilinə artıq başlanılıb. “AzerGold” QSC-nin nəzdində yaradılan İşçi Qrupu, fəaliyyətin təşkil edildiyi sahələr, o cümlədən infrastruktur üzrə ümumi baxış keçirmək, Saziş çərçivəsində görülən işlər və mövcud vəziyyəti təhlil etmək, zəruri tədbirləri müəyyənləşdirmək və təkliflər formalaşdırmaq vəzifəsi ilə tapşırılıb. Eyni zamanda, fəaliyyət və nəzarətin təşkili məqsədilə Rəhbər Komitənin yaradılması üzrə müvafiq işlər aparılır.

Saziş ilk olaraq 20 avqust 1997-ci ildə Azərbaycan Respublikasının "Azərqızıl" Dövlət Şirkəti ilə “R.V. Investment Group Services, LLC” arasında imzalanmışdı. 22 yanvar 2000-ci ildən etibarən, “Azərqızıl” dövlət şirkətinin ləğv edilməsi nəticəsində Ekologiya və Təbii Sərvətlər Nazirliyi Sazişdən irəli gələn öhdəliklər üzrə hüquqi varis hesab edilirdi.

Aprelin 1-nə “AzerGold” ASC-nin qiymətli metalların satışından əldə etdiyi ümumi gəlir 1 milyard 213 milyon 911 min manat təşkil edib. Bu gəlirin böyük hissəsi - 1 milyard 158 milyon 829 min manatlıq ixrac gəlirləridir, 55 milyon 82 min manatı isə daxili bazarda satışdan əldə olunub.

“AzerGold” SC 2024-cü ildə 70 min unsiya qızıl hasil edib satmağı planlaşdırıb. Bu, əvvəlki illə müqayisədə istehsalın 10%, satışın isə 3% artması deməkdir.