Azərbaycan və RF gömrükçüləri yüklərin daşınmasında yaranan problemləri müzakirə edəcəklər

Noyabrın 26-da Xaçmaz Gömrük İdarəsinin “Samur” gömrük-keçid məntəqəsində Azərbaycan və Rusiya gömrük xidməti nümayəndələrinin növbəti işçi görüşü keçiriləcək.

 Görüşdə məqsəd gömrük-keçid məntəqələrində yaranan problemləri yerində həll etmək,  keçid məntəqələrinin işinin səmərəliliyini artırmaq üçün müvafiq tədbirlər görmək və bununla əlaqədar məlumat mübadiləsini həyata keçirməkdir.

Dövlət Gömrük Komitəsinin mətbuat xidmətinin məlumatına görə, Azərbaycan və Rusiya gömrük xidməti nümayəndələri müxtəlif keçid məntəqələri üzrə gömrük əməliyyatları, gömrük nəzarətinin təşkili, qarşılıqlı yardım və əməkdaşlıq məsələlərilə yanaşı, iki ölkə arasında kənd təsərrüfatı sahəsində mal dövriyyəsinin artımı və son günlərdə Azərbaycandan Rusiyaya daşınan kənd təsərrüfatı məhsullarının təyinat məntəqələrinə çatdırılmasında yaranan problemlər və onların aradan qaldırılması yollarını müzakirə edəcəklər.

Azərbaycan DGK-dan qeyd olunub ki, RF istiqamətində gömrük məntəqəsindən yük avtomobillərinin keçməsinin zəif olması məntəqənin fəaliyyətilə əlaqədardır, Rusiyanın yol vergisinə dair qəbul edilməsi nəzərdə tutulan yeni qanun layihəsi ilə əlaqədar deyil.

Avtomobil şirkətləri və özəl yükdaşıyanlar bu planlara etiraz edirlər, odur ki, Dağıstan Respublikası ərazisində işi dayandırıblar.

  Hazırda Dərbənd stansiyasında Azərbaycandan aparılan kənd təsərrüfatı məhsulları ilə yüklənmiş 200-dək vaqon gözləyir.

DGK yaranmış problemlə bağlı Azərbaycan hökumətini məlumatlandırıb.

Azərbaycan DGK-nın məlumatına görə, 2015-ci ilin 9 ayında Azərbaycan Rusiyaya 152,2 min ton həcmində kənd təsərrüfatı məhsulu, o cümlədən ümumi məbləği $131,4 mln. dəyərində çay ixrac edib. --08D--