Bakı ŞİH podrat və nəzarəti eyni şirkətə tapşırıb

Satınalmalar üzrə Dövlət Agentliyi Bakı şəhər İcra Hakimiyyətinin bu ilin 8 ayında satınalmaları barədə məlumat yayıb. Onların bəzisini normal ağılla dərk etmək olmur. 

Bakı şəhər İcra Hakimiyyətinin mənzil-kommunal təsərrüfatı departamenti “AZ-İnşaat” MMC ilə prospekt, küçə, səki, park və xiyabanların yenidən qurulması, təmiri və abadlaşdırılması barədə sazi imzalayıb. İşlər 23 319 644 manat qiymətləndirilib. Tərəflər bu işə nəzarət üçün 5 mln manatlıq müqavilə də bağlayıb. Məntiqlə, podrat və nəzarət eyni şirkətə həvalə edilməməlidir. Göründüyü kimi, nə dövlət satınalmalarına nəzarət strukturu, nə də Bakı İH başçısı, professor Hacıbala Abutalıbov bu faktı sezməyib. “AZ-İnşaat” MMC Bakı İH-nin köhnə tərəfdaşıdır. 2012-ci ildə şirkət yuxarıda deyilən işlər, həmçinin yaşayış və qeyri-yaşayış evlərinin sökülməsi üçün meriya ilə 50 mln manatlıq müqavilə bağlayıb. Bu il şirkət yaşayış və qeyri-yaşayış evlərinin sökülməsi üçün İH-dən 43 mln manat alıb. 

2013-cü ildə Bakı İH müxtəlif işlər üçün 134 556 min manatlıq müqavilə bağlayıb. 2012-ci ildə bu göstərici 452 mln manatı keçib. 2013-cü ilin dövlət büdcəsindən dövlət əsaslı tikinti layihələri üçün “meriya” 644 mln manatlıq “tikə” götürüb. Bu, ötən ilkindən 2 dəfə çoxdur. 

Bu il Bakı İH “Tarixi Memarlıq” MMC ilə binaların fasad və damının təmir və bərpası, eləcə də işıqlandırılması üçün 67 999 798 manatlıq müqavilə bağlayıb. Bu şirkət 15,6 mln manatlıq kommunal təyinatlı maşın və avadanlıqlar tədarük edəcək. 

2012-2013-cü illərdə Bakıda 2 iri yeraltı qaraj tikilir. Hər iki iş “Alpina-A” MMC-yə həvalə edilib. Azadlıq meydanının altındakı qaraj üzrə müqavilənin qiyməti 91 551 446 manatdır. Füzuli və Bədəlbəyli küçələrinin arasında park kompleksi tikilib və ona 198 994 301 manat 90 qəpik xərclənib. 08B