Bakıda Azərbaycan-Polşa biznes forumu keçiriləcək

15 dekabr 2014-cü il tarixində Azərbaycan-Polşa iqtisadi əməkdaşlıq üzrə hökumətlərarası komissiyasının 7-ci iclası çərçivəsində biznes forumu keçiriləcək, deyə Azərbaycanda İxracın və İnvestisiyaların Təşviqi Fondu (AZPROMO) məlumat verir.

Biznes forumda iqtisadiyyatın müxtəlif sahələrini təmsil edən 30-a yaxın Polşa şirkətinin iştirakı nəzərdə tutulur. Bu ilin 9 ayında Polşa şirkətləri Azərbaycana $49,6 mln məbləğində mal ixrac edib. Azərbaycanın Polşaya ixracat həcmi $13,3 mln olub, deyə AR Gömrük Komitəsi məlumat verir. Azərbaycanın ixracatı propilen (16 489 ton), qoz (65 ton), meyvə şirəsi (590,1 ton), aviasiya kerosini (204,3 ton) və alüminium lövhələrdir (16 ton). Polşadan 550 adda mal idxal edilib. Bunlar əsasən ərzaq, gigiyena vasitələri, neft emalı, metallurgiya, sellüloz-kağız məhsulları, paltar və s.-dir.

Azərbaycanla Polşanın ticari əlaqələrinin həcmi barədə tərəflərin verdiyi məlumatlar çox fərqlidir.

Polşa Mərkəzi Statistika İdarəsinin məlumatına görə, 2013-cü ildə Azərbaycandan $20 mln məbləğində mal idxal olunub, ölkəmizə $129 mln 265 min məbləğində mal ixrac edilib. Bu, Azərbaycan gömrüyünün göstərdiyindən 2 və 2,7 dəfə (ixrac $10,2 mln və idxal $46,4 mln) çoxdur. 

Maraqlıdır ki, Azərbaycan «Azərkimya»nın şəxsində Polşaya propileni orta hesabla $604,4-a satır, halbuki Polşa bu malın tonunu $1275,7-a alır (2013-cü ilin məlumatı). Söhbət 13,6 min ton propilendən gedir. Fərq təxminən $8 mln-dır. 08