Bakıda Çin şirkətlərinin sərgisi keçiriləcək

Bakı/23.08.23/Turan: Sentyabrın 28-30-da Bakı Sərgi Mərkəzində 120-yə yaxın Çin şirkətinin iştirak edəcəyi ikinci World Trade Expo Azerbaijan & China Created Fair sərgisi keçiriləcək.

Çindən olan şirkətlər sərgidə ən azı 10 sahədə, o cümlədən tekstil və geyim, tikinti materialları və maşınqayırma, sənaye və mexaniki avadanlıq, məişət elektronikası və məişət texnikası, avtomobil hissələri və aksesuarları, suvarma sistemləri və s. üzrə öz məhsullarını təqdim edəcəklər. Bu barədə "Turan"a sərginin təşkilində iştirak edən “İnternational Club of Manufacturers, Exporters and İmporters” şirkətinin direktoru Aqil Babayev bildirib. 

“Keçən ilin oktyabrında Bakıda keçirilən Çin şirkətlərinin ilk WTCA 2022 sərgisini çox da uğurlu saymaq olmaz: o zaman Çində sərhədlərin bağlanması səbəbindən iştirakçı şirkətlərin nümayəndələri orada şəxsən iştirak edə bilmədilər və bu sərgidə bir çox şirkətlər MDB ölkələrində öz nümayəndələri ilə təmsil olunmağa məcbur oldular. İndi vəziyyət normallaşıb və azərbaycanlı iş adamlarının Çinlə ticarət əlaqələrinin qurulması və genişləndirilməsi üçün onlarla birbaşa görüşləri olacaq”, - deyə Aqil Babayev bildirib. Çin şirkətləri Azərbaycanda topdansatış alıcılar, tərəfdaşlar və distribütorlar axtarır.

Sərginin təşkilatçısı həmçinin "Shanghai Kanchen Exhibition Co. Ltd."dir.

Dövlət Gömrük Komitəsinin məlumatına görə, bu ilin 7 ayı ərzində Çindən Azərbaycana mal idxalının həcmi 2022-ci ilin müvafiq dövrü ilə müqayisədə 39% artaraq 1 milyard 556,2 milyon dollar təşkil edib. Bu dövrdə Azərbaycanın idxalında Çindən malların payı 16,28% təşkil edib. 08B