Bakıda dövlət satınalmalarına məsul olan dövlət strukturlarının əməkdaşları üçün təlim keçirilir

Bakıda dövlət satınalmalarının təmin edilməsi üzrə komissiyaların işində iştirak edən dövlət strukturlarının əməkdaşları üçün təlim keçirilir

İqtisadiyyat Nazirliyinin mətbuat katibi Abbas Əliyev Turan-a deyib ki, təlimlərə icra hakimiyyəti orqanlarının dövlət satınalmalarına cəlb olunan 120-dək mütəxəssisi cəlb edilib. Onların arasında ƏƏSMN, “Meliorasiya və Su Təsərrüfatı” ASC, AMEA, Bakı Apellyasiya Məhkəməsi, Məhkəmə-Hüquq Şurası, Rəssamlar İttifaqı və s var.

«Təlim kurslarında dövlət vəsaitlərindən daha səmərəli istifadə edilməsi, dövlət satınalmaları sahəsində mövcud qanunvericilik, satınalma prosesində şəffaflığın təmini, satınalma prosedurlarına əməl olunması və səmərəliliyin yüksəldilməsi istiqamətində həyata keçirilən tədbirlər barədə ətraflı məlumat verilib», deyə İqtisadiyyat Nazirliyinin mətbuat katibi bildirib.

Təlim İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin təşkilatçılığı ilə keçirilir və iyulun 29-da başa çatacaq.

Bu ilin yanvarında Satınalmalar üzrə Dövlət Agentliyi ləğv edilib və onun səlahiyyətləri Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə verilib. 08D