Bank of Baku kreditlərin evə göndərilməsi layihəsini işə salır

Azərbaycan bank təcrübəsində ilk dəfə olaraq Bank of Baku istehlakçı kreditlərinin vətəndaşların yaşadığı ünvana çatdırılmasını həyata keçirməyə imkan verən kampaniyaya başlayır.

Bankdan verilən məlumata görə, layihə çərçivəsində vətəndaşlar pul krediti kartını və Bolkart mərhələli ödəmə kartını əldə edəcəklər. Min ailənin yaşayış ünvanına artıq zərflər göndərilib. Zərflərdə konkret ailə üçün xüsusi olaraq hazırlanmış plastik kartlar, bu kartlar haqqında məlumat olan kitabça və onların aktivləşdirilməsi şərtləri yer alır. Kartların aktivləşdirilməsi mexanizmi isə kifayət qədər sadələşdirilib. Kartı aktivləşdirmək istəyən ailə zərfdəki 7 rəqəmli unikal kodu öz mobil telefonundan SMS-lə 8145-ə göndərməlidir.

Bundan sonra bank əməkdaşları SMS göndərənlərlə əlaqə saxlayacaq və kartları aktivləşdirmək üçün onlara həftə içi və ya şənbə günü baş çəkəcək. Bununla yanaşı, kartları istənilən bank məntəqələrinə baş çəkərək də aktivləşdirmək olar. “Ailə kartı” çərçivəsində pul krediti arayışsız və 2% endirimlə verilir. Kreditin maksimum məbləği 5000 AZN, müddəti 30 aydır.

Bolkart pulsuz kredit kartıdır, bir çox yerli mağazalarda alış-veriş etmək imkanı verir. Kartla əldə edilən malı mərhələli olaraq 1, 3, 6, 12 ay ərzində ödəmək olar. İstehlakçılar ölkənin təxminən 500 mağaza və ticarət mərkəzində kartla alış-veriş edə bilər. Bolkart kredit kartından ətriyyat, kompüter və məişət texnikası, mobil rabitə, mebel mağazalarında, habelə restoranlarda və supermarketlərdə istifadə etmək olar. Bolkart-ın maksimum balansı 3000 AZN-dir.

Kredit çatdırılması xidmətindən istifadə etmək istəyən ailə “777” kodunu SMS-lə 8145 nömrəsinə göndərə bilər. Mesaj daxil olan kimi bankın əməkdaşları mobil nömrə sahibi ilə əlaqə saxlayacaqlar. -15D-