Ziddiyyətlər içində Qarabağ həmrəyliyi

“Azad Qarabağ Uğrunda” Alyansı (AQUA) çərşənbə günü “Ambassador” otelində “Qrabağ Naminə Həmrəylik” Forumu keçirib.

Forumun üzvü olan Qarabağ Azadlıq Təşkilatının sədri Akif Nağı tədbirin 31dekabr - Dünya Azərbaycanlılarının Həmrəylik Gününə yaxın vaxtda keçirilməsinə diqqət çəkib. Bunu dünya Azərbaycan diaspor qurumlarına dünya birliyinin diqqətini Qarabağ probleminə yönəltmək mesajı adlandırıb. Qarabağın işğaldan azad edilmə müddətinin çox uzandığını deyən QAT sədri xalqı həmrəyliyə, vahid mövqeyə çağırdı. 

“Qarabağ məsələsində xalqda vahid mövqe var və xalq torpaqlarından imtina etməyib”, - deyə Müsavat Partiyası başqanı İsa Qəmbər A.Nağının xalqı birliyə çağırmaq tezisinə mövqe bildirib. Qarabağı danışıqlar vasitəsilə azad etməyi mümkün sayan Müsavat lideri bunun bu danışıqları aparanların birinci danışmasından, ikinci isə danışanın necə danışmasından asılı olduğunu deyib. 

İqtidarın Qarabağ məsələsinin həllində yetərli addım atmaması tənqid edilib. İqtidarın Qarabağın azadlığı ilə bağlı “lazım gəlsə...” ifadəsinin artıq xalq içində lətifəyə döndüyü, indi isə iqtidarın “zamanı gələndə” tezisinə əl atdığı qeyd olunub. Qələbə qazanmaq üçün ordunun yaşadığı problemlərdən azad olunması nəzərə çatdırılıb. 

“Qarabağ məsələsi artıq Fələstin məsələsinə çevrilir, Fələstini heç olmasa ərəb dövlətləri müdafiə edir, bizi müdafiə edən də yoxdur”, - deyə Qüdrət Həsənquliyev Qarabağ məsələsində ölkənin durumuna toxunub. Müharibə başladığı halda İran və Rusiyanın birmənalı Ermənistanı dəstəkləyəcəyi qeyd edilib. Demokratik qüvvələrin hakimiyyətə gəlməsilə problemin danışıqlar yolu ilə həll ediləcəyinə inamsızlıq ifadə olunub. Azərbaycan cəmiyyəti hakimiyyətdən israrla müharibə tələb etsə, bu yolla Qarabağı azad etməyin mümkünlüyü nəzərə çatdırılıb. 

AXCP sədrinin müavini Nurəddin Məmmədli Alyansın hazırladığı bəyannamədə iqtidara qarşı ciddi tələblər olmamasına irad tutub. N.Məmmədli rəsmi Bakını Qarabağ problemindən hakimiyyətdə qalmaq, ölkənin demokratikləşməsinə qarşı çıxmaq vasitəsi kimi istifadə etməkdə ittiham edib. “Xalqın iradəsini ifadə edən hakimiyyət Qarabağı azad edə bilər”, - deyə N.Məmmədli Q.Həsənquliyevin mövcud iqtidarı müdafiə mövqeyinə münasibət ifadə edib. Vəhdət partiyasının sədri Tahir Kərimlinin emosional çıxışı isə onun nə demək istədiyini anlamağa imkan verməyib. Gah mövcud iqtidarın onun “nəslini kəsməsi”ndən şikayət edib, gah xalq içində “Qarabağ həmrəyliyi” görmədiyini deyib.

Çıxışların yekunu olaraq Forum müharibə ruhlu bəyannamə qəbul edib. Sənəddə Azərbaycan xalqının torpaqlarının bir qarışından belə imtina etməyəcəyi deyilir, beynəlxalq qurumlar regionda müharibə istəmirlərsə təcili tədbirlər görməyə çağırılır, rəsmi Bakıya ATƏT vasitəçiliyindən imtina etməsi təklif olunur, Bütün Dünya azərbaycanlılarına qələbə naminə Ermənistana qarşı birləşmək çağırışı edilir.

Alyans 2012-ci ilin martında təsis edilib, hazırda Alyansa 13 təşkilat daxildir. -05C-