Bələdiyyə torpaqları dəyər-dəyməzinə satılır

Dövlət Torpaq və Xəritəçəkmə Komitəsi 235 bələdiyyə torpağı sahəsinin satışı və icarəyə verilməsi üzrə sayca onuncu torpaq hərracını elan edib. Əvvəlki hərraclar kimi, bu da formal xarakter daşıyacaq. Çünki rəqabət olmur, deyə ekspertlər bildirir.  

Azərbaycanda torpaq hərracları 2010-cu ilin aprelindən bələdiyyə və dövlət torpaqlarının icbari şəkildə müsabiqə ilə satılması barədə qanunvericilik normaları qüvvəyə minəndən sonra keçirilir. Bu qaydalara əsasən, hərraca çıxarılan torpaqların bazar qiyməti bu hərracda öyrəniləcək və növbəti hərraclarda əsas kimi götürüləcək. Hərraclarda cəmi bir iddiaçı iştirak etdiyindən torpaqların start və hərrac qiyməti praktik olaraq dəyişmir. Bir çox hallarda torpağın satış qiyməti bazar qiymətindən bir neçə dəfə aşağı olur. Məsələn, 1 sot torpaq Masazırda 350 manata hərraca çıxarılır. Amma burada fərdi ev tikmək üçün 1 sot torpaq 2000 manatdır. Novxanı bələdiyyəsi sahibkarlıq məqsədi üçün torpağı iki dəfə baha qiymətə təklif edir. Bu qiymət də bazar qiymətindən aşağıdır. 

İqtisadi Təşəbbüslərə Yardım ictimai birliyinin sədri Azər Mehdiyev Turan-a bildirib ki, bələdiyyələr torpağı bazar qiymətinə satır. «Bazar və hərrac qiyməti arasındakı fərq bələdiyyə məmurlarının cibinə gedir», deyə o bildirib. 

Bu cür halların qarşısının alınması üçün İTY bələdiyyə torpaqlarının start qiymətinin formalaşma mexanizminin təkmilləşdirilməsini təklif edir. Məsələn, təklif edilir ki, müstəqil qiymətləndirici cəlb edilsin. 

Torpaqların satışı və icarəsi Azərbaycanda bələdiyyələrin büdcəsinin formalaşmasının əsas mənbəyidir. Ölkədə bələdiyyə torpaqlarının satışı zamanı çoxlu korrupsiya faktları aşkarlanıb. 08B.