Beynəlxalq ekspertlər QK bazarında pulların yuyulması vəziyyətini qiymətləndirir

Bu gün Qiymətli Kağızlar üzrə Dövlət Komitəsində Avropa Şurasının Pulların yuyulmasına və terrorçuluğun maliyyələşdirilməsinə qarşı tədbirlərin qiymətləndirilməsi üzrə Ekspertlər Komitəsinin (MONEYVAL) qiymətləndirmə missiyası ilə görüş keçirilib. 

QKDK-nın press-relizində qeyd edilir ki, missiyanın məqsədi MONEYVAL-ın daxili prosedur qaydalarına uyğun olaraq Azərbaycanda maliyyə sisteminin cinayət yolu ilə əldə edilmiş pul vəsaitlərinin leqallaşdırılması və terrorçuluğun maliyyələşdirilməsi (PY/TMM) risklərinə qarşı həssaslığını beynəlxalq standartlar əsasında qiymətləndirməkdən ibarətdir. 

QKDK sədri Rüfət Aslanlı missiya üzvlərini salamlayaraq Azərbaycan Hökumətinin MONEYVAL ilə əlaqələrə xüsusi önəm verdiyini və mövcud məhsuldar əməkdaşlıq çərçivəsində ölkədə PY/TMM sisteminin beynəlxalq standartlara uyğun qurulması istiqamətində islahat gündəliyinin hazırlanaraq uğurla icra edildiyini qeyd etdi. R.Aslanlı 2008-ci ildə həyata keçirilmiş son qiymətləndirmədən sonra müvafiq sahə üzrə effektiv hüquqi normativ bazanın yaradılması, institusional potensialın artırılması və beynəlxalq əməkdaşlığın genişləndirilməsi istiqamətində görülmüş işlər barədə görüş iştirakçılarına ətraflı məlumat verib. 

Missiya rəhbəri Con Beyker bildirib ki, Azərbaycan ilə MONEYVAL arasında əməkdaşlığın hazırkı səviyyəsindən məmnunluğunu ifadə edərək son illərdə ölkədə PY/TMM sahəsində həyata keçirilmiş əhəmiyyətli hüquqi və institusional quruculuq işlərini yaxından izlədiyini vurğulayıb. O, hazırkı qiymətləndirmə çərçivəsində əsas diqqətin mövcud PY/TMM sisteminin effektiv tətbiqi mexanizmlərinə yetiriləcəyini bildirib. 

Qeyd edək ki, QK bazarı zəif inkişaf etsə də, dövlət nəzarət strukturları (QKDK, Dövlət Maliyyə Monitorinqi Xidməti) şübhəli əqdlər barədə ictimaiyyətə məlumat verməyib. 

Qanunvericiliyə əsasən, məbləği 20 min manatı kçeən istənilən əməliyyat nəzarət strukturlarına bildirilir. Korporativ QK üzrə əməliyyatların çoxu birjadankənar həyata keçirilir. Normativ-hüquqi aktların tələblərinə zidd olaraq bu əqdlər barədə informasiya investorlardan və başqa maraqlı tərəflərdən gizlədilir. QKDK mətbuatın bu barədə tənqidinə reaksiya vermir. 

2013-cü ildə Azərbaycanda korporativ QK üzrə 1 mlrd 736,84 mln manatlıq 749 əqd qeydiyyata alınıb. Bazarda artım 31% təşkil edib.  08D