Bu il Azərbaycan aviaşirkətləri rekordlar vurur

Bu il Azərbaycan aviaşirkətləri yük və sərnişin daşımalarında rekordlar vurub. 

Bu ilin 11 ayında aviaşirkətlər 111,6 min ton yük (+59,9%) və 1 550,1 min sərnişin (+4,2%) daşıyıb. 2012-ci ildə yük daşımaları həcmi 82 min ton olub. Bunun 80 min tonu beynəlxalq marşrutlarla daşınıb. Ötən il sərnişin daşımaları 2007-ci ildən sonra rekord vurub – 1 599 min sərnişin. 

Dövlətstatkoma görə, sərnişin daşımalarının 99,5%-i “Azerbaijan Airlines”in payına düşüb. Karqo daşımalarda 99% “Silk Way Holding”in iki aviaşirkətinə məxsusdur. 

AZAL-ın 28 Boeing, Airbus, Embraer və Ту-154 layneri var. Onların üçü hökumətin sərəncamındadır. Maraqlıdır ki, bu il aviaşirkət hərrac keçirmədən ATR tipli 6 təyyarə satıb. Aviaşirkətin mətbuat katibi Məhərrəm Səfərli Turan-a bildirib ki, 2007-2008-ci illərdə alınan təyyarələrin kimə satıldığını bilmir. 

Maraqlıdır ki, statistik hesabatlarda “Silk Way Business Aviation” aviaşirkətinin sərnişin daşıma göstəriciləri açıqlanmır. Onun Gulfstream, Boeing və ATR tipli 6 layneri var. 08B