ÇXR Azərbaycana növbəti qrant ayırıb

Çin Xalq Respublikasının hökuməti Azərbaycana 30 milyon yuan (4.477.611 ABŞ dolları) məbləğində növbəti qrant yardımı ayırıb. Bu barədə saziş 5 dekabrda Bakıda imzalanıb. 

Müxtəlif kommunal texnikanın tədarükünü nəzərdə tutan sazişi Azərbaycan Respublikası baş nazirinin müavini Abid Şərifov və Çin Xalq Respublikasının ölkəmizdəki səfiri Xun Tsyuin imzalayıb. Mərasimdə yalnız yerli rəsmi KİV iştirak edib. 

Rəsmi məlumatda deyilir ki, bu günə qədər Azərbaycan hökuməti və Çin Xalq Respublikası hökuməti arasında ümumi məbləği 245 milyon Çin yuanı (36.567.164 ABŞ dolları) olan 9 texniki-iqtisadi əməkdaşlıq sazişi imzalanıb. Bu sazişlər çərçivəsində təkcə 2012-ci ildə Azərbaycana Çin istehsalı olan kommunal təyinatlı 160-dan artıq texnika gətirilib. Hazırda tikinti sahəsində istifadə etmək üçün 155 ədəd texnikanın ölkəmizə gətirilməsi məqsədi ilə danışıqlar aparılır. Eyni zamanda, Azərbaycan əlavə olaraq kommunal təyinatlı 50 texnikanın alınması üçün Çin hökumətinə müraciət edib. Bundan əlavə, iki ölkə arasında imzalanmış texniki-iqtisadi sazişlər çərçivəsində “Naxçıvan Taxıl Məmulatları Sənaye Kompleksi” MMC-nin toxumçuluq təsərrüfatının maddi-texniki bazasının gücləndirilməsi üçün tələb olunan maşın, aqreqat və avadanlığın alınaraq muxtar respublikaya çatdırılması məsələsi ilə bağlı müzakirələr aparılır.

Azərbaycan hökumətinin tikinti texnikasını necə böləcəyi, Naxçıvan MR-in özəl müəssisəsinə Azərbaycan dövləti adına Çindən niyə yardım edildiyi qaranlıq qalır. 

Azərbaycanın kommunal sektoru institusional islahatların faktiki aparılmadığı sahələrdəndir. Sektor dövlətin nəzarətindədir. Məişət tullantılarının toplanması üzrə azsaylı müəssisələr müflis olub və ləğv edilib. 08D