DB nağdsız hesablaşmaların stimullaşdırılmasında Azərbaycana kömək edəcək

Vergilər Nazirliyi və Mərkəzi Bank Dünya Bankından nağdsız əməliyyatların stimullaşdırılması ilə bağlı texniki yardım almaq istəyir. Vergilər Nazirliyinin məlumatına görə, mart ayının 12-də vergilər nazirinin birinci müavini Natiq Əmirov Dünya Bankının Azərbaycan üzrə ölkə iqtisadçısı cənab Konqyan Tanın rəhbərlik etdiyi nümayəndə heyəti ilə görüşüb. Yerli strukturlar saziş layihəsi hazırlayıb.

Bu tədbirlər nağd əməliyyatların məhdudlaşdırılması və nağdsız əməliyyatların stimullaşdırılması sahəsində ölkələr üzrə beynəlxalq təcrübənin araşdırılması və icmal hesabatın hazırlanmasını, Azərbaycanda nağd və nağdsız əməliyyatlar sahəsində mövcud vəziyyətin və bu əməliyyatların büdcəyə təsirinin qiymətləndirilməsini, nağdsız əməliyyatların stimullaşdırılmasında vergi orqanlarının rolunun həm qanunvericilik, həm də inzibatçılıq baxımından müəyyənləşdirilməsini və s. nəzərdə tutur.

Tanın sözlərinə görə, ilkin mərhələdə yalnız nağdsız əməliyyatların stimullaşdırılması sahəsində texniki yardımın göstərilməsi məsələsi Dünya Bankı tərəfindən məqbul hesab edilib, bələdiyyələrlə bağlı texniki dəstəyin göstərilməsi məsələsinə gələcəkdə baxılması nəzərdə tutulub.

Azərbaycan 1992-ci ildən DB-nin üzvüdür və 51 layihə üçün $3,3 mlrd kredit alıb. Hazırda 17 layihə davam etdirilir. --17D—