DGK-nın xarici ticarət birliyi barədə əsasnamə təsdiq edilib

Azərbaycan Respublikası Dövlət Gömrük Komitəsinin kollegiyası yanvarın 30-da “Azərterminalkompleks” Təsərrüfat Hesablı Xarici İqtisadi Birliyi haqqında Əsasnaməni təsdiq edib. Sənəd dövlət normativ aktlar reyestrinə daxil ediləndən sonra qüvvəyə minib. 

Birlik təsərrüfat hesablıdır. Əsas fəaliyyət istiqamətləri xarici ticarət əməliyyatları iştirakçılarına gömrük üzrə xidmət göstərmək, müsadirə edilmiş mallların satışı üzrə hərrac təşkilidir. Birlik sahibkarlarla gömrük işçiləri arasında vasitəçidir. O, bəyannaməçiyə, mallar barədə səlahiyyəti olan digər şəxslərə gömrük bəyannaməsinin və qanunvericiliklə tələb olunan digər sənədlərin tərtib edilməsində və malların gömrük rəsmiləşdirilməsi üzrə digər əməliyyatların həyata keçirilməsində xidmətlər göstərir, malların yoxlama tərəzilərində çəkilməsini təmin edir.  

Bundan başqa, DGK strukturu gömrük nəzarəti zonasında tikinti-quraşdırma, nəşriyyat və poliqrafiya fəaliyyətini həyata keçirmək, o cümlədən həmin fəaliyyət nəticəsində əldə edilmiş məhsulların satışını təşkil etmək, gömrük ərazisində yerləşən anbarlarda, terminallarda və digər yerlərdə müsadirə edilmiş malların və nəqliyyat vasitələrinin saxlanılmasını və mühafizəsini təmin etməklə məşğul olur. Birlik həmçinin dünya əmtəə və xidmətlər bazarının konyunkturasını öyrənmək və əldə edilmiş məlumatlardan istifadə etməklə məlumatlandırma və məsləhət xarakterli xidmətlər göstərir. O, həm də gömrük bəyannamələrinin elektron formada təqdim olunmasının ümumiləşdirilmiş məlumat bazasını yaratmaq, uçotunu aparmaq və bununla bağlı nəzarəti həyata keçirmək səlahiyyətinə malikdir. 

«Azərterminalkompleks» 1995-ci ildə yaradılıb və DGK-nın binasında yerləşir. Nizamnamə kapitalı 40 min manatdır. 

Xarici ticarət əməliyyatı iştirakçıları bildirir ki, «Azərterminalkompleks» gömrükdə korrupsiyanın əsas həlqələrindən biridir. Normal ölkələrdə «Azərterminalkompleks»in funksiyalarını gömrük brokerləri həyata keçirir. 08D