Vəkil Ağır Cinayətlər üzrə İstintaq İdarəsini özbaşınalıqda ittiham edir

Tanınmış vəkil Fuad Ağayev Müsavat Partiyası başqanının müavini Tofiq Yaqublu və “REAL” hərəkatınını rəhbəri İlqar Məmmədovun İsmayıllı hadisələrilə bağlı həbslərinə reaksiyaları Turan-a şərh edib. 

O, Avropa İttifaqının hər iki siyasətçinin sərbəst buraxılması haqda bəyanatını başa düşülən adlandırıb. Bu məsələdə insan haqlarının pozulması o qədər kobud halda baş verib ki, beynəlxalq birlik bəyanatla çıxış etməyə məcbur olub. 

F.Ağayev Azərbaycan Xarici İşlər Nazirliyinin Avropa İttifaqının bu bəyanatını “istintaqa müdaxilə cəhdi” saymasını ölkədə insan haqlarının pozulmasına haqq qazandırmaq kimi dəyərləndirib. 

İstintaqın gedişinə gəlincə, F.Ağayev ölkə prokurorluğunun Ağır İşlər üzrə İstintaq İdarəsini özbaşınalıqda ittiham edib. Belə ki, vəkil siyasi əsaslı hay-küylü bütün cinayət işlərində bu idarənin irəli sürdüyü ittihamların özünü heç zaman doğrultmamasına diqqət çəkib. 

Bu idarənin apardığı istintaqlar, bu istintaqlar əsasında qurulan məhkəmələrin əsassız nəticələrinə dair Avropa İnsan Haqları Məhkəməsinin neçə-neçə qərarlar verdiyi qeyd olunub. 2003-cü il prezident seçkilərində həbs edilən müxalif siyasətçilərin istintaqı və məhkəmə qərarlarını Avropa məhkəməsi əsassız sayıb. Müttəhimlərin ədalətli araşdırma hüququndan məhrun edildiyi vurğulanaraq ədalətli araşdırma tələb edilib. Həmin qərarın verilməsindən il yarım keçsə də Ali Məhkəmə bu istiqamətdə heç bir addım atmayıb. F.Ağayev istintaqın gedişində vəkillərin ittihamların əsassız olmasını sübut etmələrinə baxmayaraq, onlardan asılı olmayan səbəblərdən cinayət işlərinin məhkəməyə çıxarıldığını deiyb.  Bu yalan ittihamlar əsasında vətəndaşların qanunsuz olaraq azadlıqdan məhrum edildikləri qeyd olunub.-05B-