Dollarla korporativ qiymətli kağızlar üzrə əməliyyatlar 25 dəfə artıb

Yanvar-avqustda qiymətli kağızlarla əməliyyat həcmi 7 mlrd 454 mln 997,96 min manat (ötən ilin eyni dövrü ilə müqayisədə +55%) olub. 

Qiymətli Kağızlar üzrə Dövlət Komitəsinin məlumatına görə, 8 ayda korporativ qiymətli kağızlarla əməliyyatlar  3,3 dəfə  - 3 mlrd 415 mln 835,85 min manatadək artıb. Səhmlərlə əməliyyat həcmi 1 mlrd 69 mln 447,72 min manat (2,6 dəfə artım), o cümlədən ilkin bazarda 917 mln 766,86 min manat (3,1 dəfə artım), təkrar bazarda 151 mln 680,86 min manat (+ 24%) olub.

Korporativ qiymətli kağızlarla əməliyyatlar  3,7 dəfə - 2 mlrd 346 mln 388,13 min manatadək, o cümlədən ilkin bazarda 117 mln 12,914 min manat (- 28%), təkrar bazarda manatla 518 mln 277,3 min manat (+30%) olub. İlkin bazarda ABŞ dolları ilə əməliyyat həcmi 1 mlrd 706 mln 383,73 min manat (25 dəfə artım) olub. 

Dövlət qiymətli kağızları ilə əməliyyatlar 7% artaraq 4 mlrd 39 mln 162,11 min manat təşkil edib. Maliyyə Nazirliyinin istiqrazları ilə əməliyyat həcmi 77 mln 824,08 min manat (+4%), AMB notları ilə 425 mln 895,04 min manat (+61%), repo əməliyyatlarla 3 mlrd 535 mln 442,99 min manat (+3%) olub.

Ötən il qiymətli kağızlarla əməliyyat həcmi 8 mlrd 824 mln 389,43 min manat (il ərzində mənfi 6%) idi. --17D—