Dövlət yardımı alan ailələrin 30%-i aktiv əməyə cəlb ediləcək

Əmək və Əhalinin Sosial Müdafiəsi Nazirliyinin

araşdırmalarına görə, dövlət yardımı alan ailələrin 30%-i aktiv əməyə cəlb edilə bilər. Nazirlikdə hesab edirlər ki, bu, onları dövlət yardımından asılılıqdan azad edər və gəlirlərini artırar. 

Bunun üçün qanunvericiliyə dəyişiklik edib «Sosial Yardım Fondu» yaradılacaq. Hazırda bir sıra ölkələrin (Braziliya, Meksika, Rusiya, ABŞ və s.) təcrübəsi öyrənilir. 

Qeyd edək ki, aztəminatlı ailələrin səmərəli məşğulluğuna aktiv formada dəstək verilməsi məqsədilə ünvanlı yardım almaq hüququna malik ailələrə həmin yardımın orta aylıq məbləğinin 12 misli məbləğində birdəfəlik pul yardımı ödənilməsini nəzərdə tutur. 

2012-ci ildə  ailənin hər birinə ayda orta hesabla 116 manat, hər ailə üzvünə 26 manat ünvanlı sosial yardım ödənilib. Kənd yerlərində maldarlıq və əkinçilik, şəhər və qəsəbələrdə isə əmtəə və xidmətlər istehsalı sahəsində vərdişlərin olması bu proqrama qoşulmaq üçün yetərlidir. Bu zaman pul yardımı almaq və ya əməklə məşğul olmağı vətəndaşlar özü seçəcək, deyə nazirlikdə Turan-a bildiriblər. 

2012-ci ildə 548 668 nəfər ailə üzvünü əhatə edən 124 217 ailə ünvanlı sosial yardım alıb. Bu məqsədlə dövlət büdcəsindən 170 mln manat ayrılıb. 08D