Dövlətstatkom - 105 mindən çox yeni iş yeri açılıb

Dövlətstatkom 2014-cü il ərzində ölkədə 127315 yeni iş yeri açıldığını bəyan edir. Bunun 30%-i Bakının payına düşür. Əhali bu bəyanatlara inanmır. Rəsmi məlumata görə, bunun 105 mini  daimi iş yeridir. Onların 80,2 min və ya 76,3%-i hüquqi şəxs yaratmadan sahibkarlıqla məşğul olan fiziki şəxslər yaradıb. Qalan daimi iş yerlərinin 12,6 faizi yeni yaradılmış müəssisə və təşkilatlarda, 10,4 faizi mövcud müəssisə və təşkilatlarda, 0,7 faizi fəaliyyətini bərpa etmiş müəssisə və təşkilatlarda yaradılıb.

DSK-ya görə, fevralın əvvəli üçün iqtisadiyyatda məşul əhalinin sayı 4,6 mln nəfər olub. 2014-cü ildə muzdlu işçi sayı cəmi 6 min nəfər artıb. İşsiz statusu alanlar ilin əvvəlində 28,8 min nəfər təşkil edib.

Gəlir vergisinin həcmi də (980,2 mln manat) iş yerlərinin artdığını göstərir. 2014-cü ildə bu vergilər 14% artıb. Amma onu da nəzərə almaq lazımdır ki, orta əmək haqqı da artıb (4,5%). 

Ekspertlər onu da qeyd edir, hökumət sahibkarlığın inkişafı və yeni iş yerlərinin açılması haqda bəyanatlarda bağlanan müəssisələr, ləğv ediilən iş yerlərindən danışmır, kadr axını, müvəqqəti iş yerlərinin bağlanması göstərilmir, yeni iş yerlərinin sayı illik hesablamada artan templə göstərilir. 

Qeyd edək ki, bu il büdcə gəlirləri azaldığı üçün iqtisadi aktivlik azala bilər. Bu isə iş yerlərinin azalması ilə nəticələnəcək. Artıq müəssisələrin fəaliyyətinin dayanması, işçilərin işdən çıxarılması, haqqı ödənilməyən məzuniyyətlər barədə məlumatlar var. 08D