Dubai Port World Ələt limanına konsaltinq xidmətləri göstərəcək

Dünyada iri liman operatoru “DP Worlds” (Dubai Port World) Ələt qəsəbəsində azad ticarət zonasının yaradılması üçün konsaltinq xidmətləri göstərəcək.

Turan məlumat verir ki, bu barədə sazişi çərşənbə günü Azərbaycan iqtisadiyyat nazirinin müavini Niyazi Səfərov, Bakı Beynəlxalq Dəniz  Ticarət Limanının baş direktoru Taleh Ziyadov və “DP Worlds” şirkətlər qrupunun prezidenti Sultan Əhməd bin Sulayem imzalayıblar.

İqtisadiyyat naziri Şahin Mustafayev imzalanma mərasimində bildirib ki, “DP Worlds” ən iri konteyner limanının operatorudur və dünyanın 40 ölkəsində 77 limanı var.

“İlin sonunadək limanda 2 yanalma körpüsü inşa ediləcək. Ümumilikdə, 11 yanalma körpüsünün inşası planlaşdırılır”, - nazir bildirib.

“DP Worlds” şirkətlər qrupunun prezidenti Sultan Əhməd bin Sulayem öz növbəsində deyib ki, Bakının Avrasiya koordinasiya mərkəzi olması üçün lazım olan hər şey var.

“İnanırıq ki, sizdə bundan ötrü zəruri olan hər şey var: yüksək texnologiya, resurslar. Bizim isə təcrübəmiz var. Biz bütün bunları birləşdirərək vahid güclü kommersiya strukturuna çevrilə bilərik”.

Xatırladaq ki, 2016-cı il martın 17-də prezident İlham Əliyev Bakının Qaradağ rayonunun Ələt qəsəbəsində yeni Bakı Beynəlxalq Dəniz Ticarət Limanı da daxil olmaqla, azad ticarət zonası kimi xüsusi iqtisadi zonanın yaradılması üzrə tədbirlər haqqında sərəncam imzalayıb.71D