Əhali siyahıyaalınması məlumatları istifadəçilərə təqdim edilib - DSK sədrinin müavini

Bakı/13.12.22/Turan: 2019-cu ilin oktyabr ayı üzrə əhalinin siyahıyaalınması məlumatları bu ilin avqust ayı cədvəlinə uyğun olaraq 30 cilddə dərc edilərək istifadəçilərə təqdim edilib. Bu barədə "Turan"a Dövlət Statistika Komitəsinin sədr müavini Yusif Yusifov bildirib.

Onun nəticələri üzrə müvafiq məlumatlar əsasında cari uçot  məlumatlarının illik əsasda verilməsi il başa çatdıqdan sonra elektron informasiya resursları vasitəsilə təmin olunacaq, deyə o qeyd edib.

2021-ci il üzrə statistik məcmuələr nəşr olunanda qrafik üzrə siyahıyaalma məlumatlarının nəşri yekunlaşmamışdı (yəni avqust ayından əvvəl kitabların bir qismi nəşr olunmuşdur). Ona görə 2021-ci ilin yekunları üzrə əvvəlki siyahıyaalma məlumatları verildi. Əks halda istifadəçilər arasında çaşqınlıq yaranardı. Biz gələn aydan başlayaraq bütün məlumatları sonuncu siyahıyaalma əsasında hazırlayacağıq", - Yusifov vurğulayıb.

Məsələn, Azərbaycan Dövlət Statistika Komitəsi 2021-ci il üçün əhalinin statistikası ilə bağlı hesabat dərc edib. Qurum bildirir ki, əhalinin cari hesablanması 2009-cu il əhalinin siyahıyaalınmasının nəticələrinə əsasən aparılıb. Üstəlik, bu ərazidə doğulan və daimi yaşamağa gələnlərin sayı əhaliyə əlavə edilib, ölən və bu ərazidən köçənlərin sayı isə azaldılıb. 2019-cu ildə keçirilmiş əhalinin sonuncu siyahıyaalınmasının nəticələri hazır olduqdan sonra əvvəlki siyahıyaalınmadan ötən dövrlər üzrə əhalinin sayı və tərkibi ilə bağlı müvafiq dəqiqləşdirmələr veriləcək”, - deyə DSK-dan bildirilib.

Xatırladaq ki, siyahıyaalınma anketində 46 sual, siyahıyaalma vərəqəsində isə 6 sual var idi.

Əhalinin siyahıyaalınması zamanı tətbiq olunacaq siyahıyaalma vərəqəsi ölkə üzrə ev təsərrüfatlarının və ailələrin sayına, yaşayış binaları və evlərinə, yaşayış üçün istifadə edilən digər tikililərə dair ətraflı məlumatların əldə olunmasına imkan verəcəkdir. Sorğu vərəqəsində isə siyahıya alınacaq hər bir şəxsin cinsi, yaşı, doğulduğu yer, vətəndaşlığı, milli (etnik) mənsubiyyəti, ana dili və sərbəst danışdığı dillər, ailə vəziyyəti, siyahıyaalma anında olduğu yerdə daimi və ya müvəqqəti yaşaması, təhsil səviyyəsi, gəlir mənbələri, məşğulluq vəziyyəti, əlilliyi, əhalinin ölkədaxili yerdəyişməsinin və xarici miqrasiyanın səbəbləri və s. mühüm göstəricilər üzrə suallar öz əksini tapıb. 08B