Ekspert dolların məzənnəsinin kəskin dəyişməsinin səbəblərini araşdırmağa çağırır

Maliyyə Bazarlarına Nəzarət Palatasının bu ayın əvvəllərində manatın məzənnəsinin qısa müddətdə kəskin möhkəmlənməsi və yenidən gözlənildiyi kimi dolların bahalaşması ilə müşahidə edilən əks-prosesin başlaması səbəblərini araşdırmasına ehtiyac var, deyə İqtisadi və Sosial İnkişaf Mərkəzinin sədri Vüqar Bayramov hesab edir.

İqtisadçı özünün «Facebook» səhifəsində yazıb ki, əksər inkişaf etmiş ölkələrdə belə hallar baş verən zaman maliyyə bazarına məsul olan dövlət qurumu spekulyativ müdaxilələrin olub-olmamasını araşdırır.

«Belə müdaxilələrin olduğu təsdiq olunan zaman bu işdə maraqlı olan bankların lisenziyalarının ləğvi daxil olmaqla, xeyili kəskin cəzalar müəyyənləşdirilir», deyə o bildirib.

V.Bayramov qeyd edib ki, milli valyutanın məzənnəsində qısa müddətli kəskin dəyişmələr bır sira bankların izafi gəlir əldə etməsinə səbəb oldu. Belə kəskin dəyişmələr nə vətəndaşlar, nə də biznes üçün əlverişlidir. Biznes üçün stabil valyuta rejimi çox əhəmiyyətlidir.

«Palata tərəfindən araşdırma aparılması gələcəkdə yeni spekulyativ müdaxilələrin qarşısının alınması baxımdan vacibdir», deyə V.Bayramov qeyd edib.

Qeyd edək ki, manatın 2016-cı ilin oktyabrından başlayan kəskin ucuzlaşması fevralın əvvəlində dayanıb və əks proses başlayıb.

Belə ki, 17 oktyabr 2016-cı ildən 1 fevral 2017-ci il kimi dolların məzənnəsi 1,5969-dan 1,92 manata möhkəmlənib, sonra kəskin düşüb. Fevralın 2-dən 16-dək dollar 19 qəpik ucuzlaşaraq 1,7296 manat olub.

Fevralın 17-dən isə manat ucuzlaşmağa başlayıb. Ayın 22-də 1 dollar 1,7447 manat olub. 71D