Ekspert: «MB ya yenə ehtiyatlarının əriməsiylə barışmalı, ya da kəskin devalvasiyaya getməlidir»

Azərbaycan Mərkəzi Bankı ya yenə ehtiyatlarının əriməsiylə barışmalı, ya da kəskin devalvasiyaya getməlidir, deyə bank məsələləri üzrə ekspert Əkrəm Həsənov hesab edir.

Turan-ın məlumatına görə, ekspert «Azadlıq» radiosuna müsahibəsində deyib ki, hələlik AMB hələ bu istiqamətdə heç bir addım atmır.

«Amma hələlik, baş bank heç birini etmir, sadəcə, banklara bir az dollar satıraq, tələblərini tam təmin etmir. Bu üzdən, banklar da dollar satışına məhdudiyyət qoyur. Amma bu çox davam edə bilməz, əks halda qara bazar güclənəcək”, deyə ekspert hesab edir.   

Ə.Həsənov xatırladır ki, o, əvvəl-axır AMB-nin banklara manat kreditləri verməyə məcbur qalacağını deyibmiş.

«Aparıcı ölkələrdən fərqli olaraq, Azərbaycanda MB-ın ayırdığı manat kreditlərinin haraya yönəldilməsinə nəzarət yoxdur. Odur ki, həmin manat kütləsinin xeyli hissəsi dərhal valyuta bazarına axır. MB-nin tədricən apardığı devalvasiya da buna rəvac verir”, deyə Həsənov bildirib.
Ekspertə görə, bu səbəbdən əlində bir az manatı olan da, onu dəyişməyə can atır. “Bu tərəfdən bağlanan banklardakı əmanətlər də manatla qaytarılır və əmanətini geri alan dərhal qaçır dollara dəyişməyə. Bir sözlə, dollara tələbat artıb”, deyə ekspert qeyd edib.

Xatırladaq ki, 22 avqustda dolların məzənnəsi 1USD/1,6204AZN olub.

Rekord 11 martda (1USD/1,6456AZN), ən aşağı məzənnə 25-26 mayda olub  - 1USD/1,49AZN. 71В