Financial Tmes: Almaniyanın RWE şirkəti Nabucco-dan gedə bilər

Almaniyanın RWE enerji şirkəti Nabucco qaz kəməri layihəsindən çıxmaq üçün danışıqlar aparır, RWE -nin 16,7% səhmini Avstriyanın OMV şirkəti ala bilər, deyə Financial Times qəzeti yazır. 

RWE və OMV qəzetə bu barədə rəsmi şərh verməyiblər. 

Bu ilin mayında məlumat verilmişdi ki, RWE AG Nabucco konsorsiumunda iştirak məsələsinə yenidən baxır.

Aprelin ortalarında RWE rəhbəri Yurgen Qrossman bəyan edib ki, konsern  Nabucco-da iştirak barədə planlarını dəyişə bilər. O, qeyd edib ki, ən vacib məsələ Xəzər qazının Avropaya lazımi həcmdə çatdırılmasıdır. Onu başqa qaz kəməi ilə ala bilsə, şirkət buna sevinər. Bəyanatda bildirilib ki, RWE üçün prioritet daha az investisiya ilə qaz mənbəyinin olmasıdır. Çünki şirkət öz qarşısına borc yükünü azaltmaq vəzifəsi qoyub və Nabucco üzrə plandan imtina ona xeyli məbləğə qənaət imkanı verər. 

Nabucco layihəsinin iştirakçıları bunlardır: OMV Gas GmbH (Avstriya), BOTAS (Türkiyə), Bulgargaz (Bolqarıstan), S.N.T.G.N. Transgaz S.A. (Rumıniya), MOL Natural Gas Transmission Company Ltd. (Macarıstan), RWE (Almaniya). İştirakçıların payı bərabərdir – hərəsi 16,67%.  Almaniyanın qaz şirkəti Bayerngas layihəyə daxil olmaq niyyətini bildirib. Qaz kəmərinin tikintisinə 2013-cü ildə, qazın kommersiya satışına 2017-ci ildə başlamaq planlaşdırılır. 

Nabucco layihəsi Xəzər və Yaxın Şərqdən qazı Aİ ölkələrinə çatdırmağı nəzərdə tutan "Cənub qaz dəhlisi" layihələrindən biridir. “Şahdəniz” yatağının işlənməsinin ikinci mərhələsində çıxarılacaq qaza (ildə 10 mlrd m3) layihə üçün əsas xammal kimi baxılır. 

Əvvəllər FGSZ qaz nəqliyyat şirkətinin 100% sahibi olan Macarıstanın MOL şirkəti Nabucco-dakı payını satmağa hazır olduğunu bildirmiş və layihənin resurs bazası və maliyyələşməsində qeyri-müəyyənliyi əsas gətirmişdi. --0—