Fiziki şəxslərin uzunmüddətli əmanətləri noyabrda 4% artıb

2012-ci ilin noyabrında Azərbaycanın kredit təşkilatlarında depozit və əmanət həcmi 207,5 mln manat və ya 2% artaraq 10409,9 mln manat olub. Son 12 ayın dördündə azalma olub və bu göstərici ümumilikdə 1517 mln manat və ya 17,1% artıb. 

Hesabat ayında manat və valyuta vəsaitləri artıb. Valyuta vəsaitlərinin həcmi 5679 mln olub, bankların ümumi depozit portfelində onların payı 54,6%-dək azalıb. Bir il əvvəl bu göstərici 56,2% idi.  

 Dekabrın əvvəli üçün fiziki şəxslər banklarda 4763 mln manat əmanət saxlayıb. Bu, ümumi göstəricinin 45,8%-dir (bir ay əvvəl 46%). 

Fiziki şəxslərin qısamüddətli əmanətləri cüzi artaraq 3025,4 mln manat təşkil edib. Uzunmüddətli əmanətlər 67,1 mln manat və ya 4% artaraq 1737,6 mln manat olub. 

Müddətli əmanətlər 6782,1 mln manatadək və ya ümumi göstəricinin 65,2%-dək artıb. Tələb edilənədək əmanətlərin ümumi həcmi 3627,8 mln manata çatıb. 

 Azərbaycan Mərkəzi Bankının məlumatına görə, manat depozitləri və əmanətləri üzrə orta dərəcə noyabrda 0,04 f.b. azalaraq 10,04%, xarici valyuta ilə əmanətlərdə 0,01 f.b. azalaraq 10,29% olub. Hesabat ayında manat depozitləri əhalidən orta hesabla illik 10,37%, valyuta depozitləri 10,84%-lə qəbul edilib. Hüquqi şəxslər üçün bu göstərici 6,74% və 3,76% olub. --15B—