Gürcüstana duz ixracı kəskin azalıb

Bu ilin 9 ayında yodlaşdırılmış xörək duzu ixracının bəyan edilən həcmi 1427,1 ton olub. Bu, 2014-cü ilin eyni dövründəkinin üçdə biri qədərdir. Malın hamısı ötən il olduğu kimi Gürcüstana ixrac edilib.

Gömrük Komitəsinin məlumatına görə, xörək duzunun 1 kq-ı $0,14 –a ixrac edilir. Azərbaycan xörək duzu tələbatının bir hissəsini idxal hesabına təmin edir. İdxal edilən duz gömrükdə 1 kq-ı $0,12-a bəyan edilir.

Dövlətstatkoma görə, yanvarda 1 kq süfrə duzu pərakəndə satışda 43 qəpik ($0,55), oktyabrda 56 qəpik olub. Oktyabrda idxal edilən duzun orta qiyməti 55 qəpik (yanvarda 41 qəpik) olub.

DGK-nın məlumatına görə, yanvar-sentyabrda 8 351,3 ton xörək duzu idxal edilib. Bu, 2014-cü ilin eyni dövründəkindən 16,8% azdır. Duz Rusiya (1700 ton), Ukrayna (1623 ton) və Türkiyədən (49,4 ton) idxal edilir.

Keyfiyyət sertifikatı reyestrinə görə, duz idxalçıları 3 fiziki şəxs, həmçinin “Lavanda” MMC və “Dincer and Carcioglu”dur. 

Dövlətstatkomun məlumatına görə, bu ilin 9 ayında yodlaşdırılmış xörək duzu istehsalının həcmi 25 min ton olub. Bu, 2014-cü ilin eyni dövründəkindən 19,8% çoxdur.

2014-cü ildə Azərbaycanda xörək duzunun istehlak həcmi 3,8% artaraq 92,2 min ton olub.

Ərzaq balansına əsasən, 2014-cü ildə Azərbaycanda 67,2 min ton duz istehsal edilib. Bu, 2013-cü ildəkindən 13% çoxdur.

Xaricdən 15 930 ton duz idxal edilib. Bu, 2013-cü ildəkindən 3,8% azdır. 08B