H.Əliyev adına NEZ-in vakuum kolonunda əsaslı təmir işləri başlanılıb

Bakı/19.04.14/Turan: Heydər Əliyev adına Bakı Neft Emalı Zavodunun (NEZ) əsas qurğularından sayılan neftin ilkin emalı üzrə 21 nömrəli ED-AVQ-6 qurğusu əsaslı təmirə saxlanılıb.

SOCAR-ın yaydığı məlumatda bildirilir ki, qurğunun vakuum kolonunun bütün quruluşunun dəyişdirilməsinə başlanılıb. Bu işlər mövcud vakuumyaratma sisteminin yenidən qurulması istiqamətində yerinə yetirilir.

Təmir zamanı qurğunun K-2 atmosfer kolonu yoxlanılacaq, sıradan çıxmış boşqablar dəyişdiriləcək, vakuum bölməsində 4 ədəd İD-7 istidəyişdiriciləri yeniləri ilə əvəz olunacaq. Qurğunun S-1/2, S-1/3 sobalarının radion hissəsinin bütün borularının dəyişdirilməsi istiqamətində işlər davam etdirilir, sobaların nəqliyyat xətləri, S-1/1 sobasında çıxış xətləri və S-3 sobasının forsunkaları yeniləri ilə əvəz olunur.

Təmir işlərinin vaxtında və lazımi səviyyədə aparılması üçün "Bərpa AS" MMC, 16 nömrəli İnşaat İstehsalat Təsərrüfat Tresti, "Azərneftyanacaq Təmir-Tikinti" QSC, "Təmir-tikinti-servis" MMC-nin işçiləri, habelə zavodun 13 nömrəli Təmirquraşdırma sahəsinin təmirçi briqadaları və 2 nömrəli istehsalat sahəsinin bütün texniki personalı gərgin əmək sərf edirlər. İlkin emal qurğusunun vakuum bölməsində təmir işlərinin 30 gün, atmosfer bölməsində isə 21 gün aparılması nəzərdə tutulur.

Xatırladaq ki, Heydər Əliyev adına Bakı Neft Emalı Zavodunun avtomobil benzini istehsal edən katalitik krekinq qurğusunda da əsaslı təmir işləri davam etdirilir.

Qeyd edək ki, bu zavodda hər il 4,5 milyon tona yaxın neft emal edilir ki, bunun nəticəsində də 1,4 milyon tona yaxın benzin və 2,4 milyon ton dizel yanacağı istehsal olunur. –12D--