Hesablama Palatası, nəhayət, təsərrüfat subyektləri haqda materialları Baş Prokurorluğa göndərib

Hesablama Palatasının 2013-cü il dekabr ayının 27-də keçirilən Kollegiya iclasında İctimai Televiziya və Radio Yayımları Şirkətinə dövlət büdcəsindən ayrılan və digər mənbələrdən daxil olan vəsaitlərin istifadəsini müzakirə edib. Həmçinin BMT yanında Daimi Nümayəndəliyinin saxlanılması,  Bakı Telefon Rabitəsi İstehsalat Birliyinin Nizami Telefon Qovşağı tərəfindən dövlət vergilərinin vergi qanunvericiliyinə uyğun hesablanılması və dövlət büdcəsinə ödənilməsinə dair nəzarət tədbirlərinin nəticələri barədə Azərbaycan Respublikasının Milli Məclisinə məlumatların təqdim edilməsi qərara alınıb. 

Bundan başqa, iclasda "Aqrolizinq" ASC-yə dövlət büdcəsindən ayrılan və təkrar istifadə edilən vəsait hesabına alınan aktivlərin (əsas və dövriyyə vəsaitlərinin) struktur bölmələri (Şəki regional logistik bazası, Şəki rayon aqroservis filialı) tərəfindən istifadəsi, uçotu, habelə lizinq əməliyyatları və göstərilən xidmətlərdən daxilolmalara dair Hesabat və Rəylər də müzakirə edilmişdir. Həm "Aqrolizinq" ASC-nin Şəki rayon Aqroservis filialının, həm də Şəki Regional Logistik Bazasının büdcə xərcləri müzakirə olunub. Hər iki təşkilatda o qədər qanun pozuntusu olub ki, “Hesablama Palatası haqqında” qanununun 2-ci maddəsinin on ikinci abzasının və Azərbaycan Respublikası Prezidentinin 2009-cu il 22 iyun 103 nömrəli Fərmanının 7-ci bəndinin tələblərinə uyğun olaraq Azərbaycan Respublikasının Baş Prokurorluğuna göndərilməsi barədə Kollegiya tərəfindən qərar qəbul edilib. 

Kollegiya iclasında Hesablama Palatasının 2014-cü il üçün iş planı da təsdiq edilib. 

Hesablama Palatası 7 dekabr 2001-ci ildən fəaliyyət göstərir və büdcə vəsaitlərinin xərclənməsinə nəzarət edir. Rəhbər işçilər (kollegiya üzvləri – sədr, müavinləri və 7 auditor) 7 ildə bir dəfə seçilir. 

Hesablama Palatası bir qayda olaraq yoxlamalarının nəticələrini açıqlamır. Bəzən ümumi nəticələri elan edir, konkret fakt və rəqəmlər gətirmir. 

“İnformasiya əldə edilməsi haqqında” Qanunun 6.0.3 maddəsinə əsasən, büdcə vəsaitlərinin yoxlanması barədə informasiyanın yayılması dövlət strukturlarının, o cümlədən Hesablama Palatasının vəzifəsidir. --17D—