Hökumət yaşayış minimumuna yenidən baxmağa hazırlaşır

Parlament komitələrində yaşayış minimumu və ehtiyac meyarı haqda qanun layihələrinin müzakirəsi gedir. Onların cüzi artırılması gözlənilir.

Yaşayış minimumunu indiki 125 manatdan 131 manata artırmaq planlaşdırılır. Əmək qabiliyyətli əhali üçün bu göstərici (2014-cü ildə 136 manat) 140 manat, pensiyaçılar və uşaqlar üçün (103 manat) 108 manat olacaq.

Ayda 1575 manat maaş (əlavə pul və ayırmalarsız) alan deputatlar Prezident Administrasiyasından gələn qanun layihəsini müsbət qiymətləndirib.

2014-cü ilin «Yaşayış minimumu haqqında» qanununa əsasən, minimal əmək haqqı və əmək penziyalarının baza hissəsi yaşayış minimumuna uyğun olmalıdır. Bundan başqa, müxtəlif müavinət, təqaüd, ünvanlı sosial yardım üçün meyar müəyyən ediləndə yaşayış minimumu nəzərə alınır.

Müstəqil ekspertlər minimal istehlak səbətinə əsaslanaraq hesablayıb ki, hakimiyyətin müəyyən etdiyi yaşayış minimumu 200 manatdan az olmamalıdır. İqtisadçı Rövşən Ağayevin sözlərinə görə, Azərbaycanda istehak səbətinin, ələlxüsus ərzaq və xidmətlərin səbətinin strukturu zəif inkişaf etmiş ölkələrin yaşayış standartlarına uyğun tərtib edilib. «Məsələn, bizdə adambaşna ət istehlakı illik 28 kq-a yaxın götürülür. Halbuki inkişaf etmiş ölkələrin göstəricisi bundan 2.5 dəfə yüksəkdir. Eynilə balıq və meyvə istehlakında da belədi. Yaxud inkişaf etmiş ölkələrdə bal minimum istehlakın struktruna daxildi, amma bizdə bal yoxdu. Yaxud artıq inkişaf etmiş ölkələrdə genişzolaqlı inetrnet xərci xidmətlər minimum istehlak standartı kimi götürülür”, deyə ekspert bildirib.

Ağayev hesab edir ki, regionlar üzrə fərqli yaşayış minimumu hesablanmalıdır. Ən azı Bakı digər iri şəhərlər və kəndlər üzrə differensial olmalıdır. 08B