İcbari sığorta ödənişinə yeni tələblər

Bakı/03.11.14/TURAN 3 noyabr 2014-cü il tarixindən İcbari Sığorta Bürosunun iştirakçıları olan sığorta şirkətlərinə qarşı irəli sürülən sığorta tələblərinin tənzimlənməsi prosesinin təkmilləşdirilməsi, sığorta tələblərinin tənzimlənməsi prosesinin idarə edilməsi məqsədi ilə hazırlanmış yeni proqram tətbiqinə başlanacaq.

 İSB-nin məlumatına görə, sentyabr ayından başlayaraq sığorta şirkətlərinin zərərlərin tənzimlənməsi üzrə nümayəndələrinə proqram təminatının istifadəsi ilə bağlı təlimlər keçirilib. «Yeni proqram təminatı vasitəsilə avtonəqliyyat vasitəsi sahiblərinin mülki məsuliyyətinin icbari sığortası, daşınmaz əmlakın icbari sığortası, daşınmaz əmlakın istismarı ilə bağlı mülki məsuliyyətin icbari sığortası və sərnişinlərin icbari fərdi qəza sığortası üzrə Büronun iştirakçıları olan sığorta şirkətlərinə qarşı irəli sürülən sığorta tələblərinin tənzimlənməsi prosesinin həyata keçirilməsi mümkün olacaq”, deyə məlumatda bildirilir.

Yeni sistem sığorta tələbləri üzrə şifahi müraciətdən başlayaraq sığorta ödənişinin verilməsinədək, həmçinin subroqasiya işinin yekunlaşdırılmasınadək prosesin idarə edilməsinə, sığorta tələbinin tənzimlənməsinin müvafiq mərhələlərində sistemin texniki imkanları hesabına iş üzrə sms, elektron poçt və ya rəsmi məktub vasitəsi ilə məlumatlandırmasına, müvafiq sığorta tələbi üzrə çatışmayan sənədlərin sistem tərəfindən müəyyən olunması, sığorta tələbini irəli sürən şəxsin, o cümlədən sığorta şirkətinin həmin sığorta tələbi ilə işləyən əməkdaşının bu barədə məlumatlandırılmasına, sığorta tələbləri və sığorta hadisələri barədə daha ətraflı və dolğun statistik məlumatların əldə edilməsi və s imkan verəcək.

İcbari Sığorta Bürosu 16 dekabr 2011-ci ildə yaradılıb. Hazırda 15 üzvü var. --17D—