III rübdə Vergilər Nazirliyi 4,5 mln büdcədənkənar vəsaitdən istifadə edib

Bu ilin III rübündə Vergilər Nazirliyinin büdcədənkənar fonduna 11 725 min manat daxil olub və oktyabrın 1-i üçün vergi qanunvericiliyinin pozulmasına görə tətbiq edilən sanksiyalar hesabına formalaşan mədaxil həcmi 21 367,2 min manat olub. 

İlin əvvəlindən fonddan 7 mln manat xərclənib. Təkcə III rübdə Vergilər Nazirliyi 4,5 mln büdcədənkənar vəsaitdən istifadə edib. Ştatlı və ştatdankənar işçilərə 3 mln manatdan çox vəsait ayrılıb. Dəftərxana və təsərrüfat mallarına 772 min manat, maşın, avadanlıq alınması və nazirliyinin başqa ehtiyaclarına 1,2 mln manat xərclənib. Qeyri-maddi aktivlər alınmasına 2 mln manat yönəldilib.                  

Oktyabrın 1-i üçün fondda 14 294,7 min manat olub. Bu, iyuldakından 2 dəfə çoxdur. 

Vergilər Nazirliyinin büdcədənkənar fondu ictimaiyyət üçün açıq olan yeganə bu tip maliyyə institutudur. Başqa nazirliklər bu rəqəmləri açıqlamır. 

Vergilər Nazirliyinin büdcədənkənar fondu vergi orqanlarının vergi qanunvericiliyinin pozulmasına görə tətbiq etdiyi cərimə və sanksiyaların 5%-dən formalaşır. Sistem 2008-ci ildən tətbiq edilir və vergi orqanlarında korrupsiyanın qarşısını almaq üçün yaradılıb.  

İşçilərin təşviqi mexanizmi bir neçə strukturda (DYP, gömrük, təbiəti mühafizə, daşınmaz əmlakın qeydiyyatı) var. Yalnız Vergilər Nazirliyi büdcədənkənar vəsaitdən istifadə barədə mütəmadi olaraq hesabat verir.