İİN: Azərbaycan iqtisadiyyatının şaxələnməsi problemsiz sürətlənir

Azərbaycan iqtisadiyyatı xarici mənfi təsirlərə davamlılıq göstərib və bütün göstəricilər üzrə artıb. Bu barədə 15 yanvarda prezident İlham Əliyevin sədrliyi ilə hökumətin müşavirəsində iqtisadi inkişaf naziri Şahin Mustafayev bildirib.

Onun sözlərinə görə, 2012-ci ildə hökumət makroiqtisadi sabitliyi qoruyub, iqtisadiyyatın şaxələndirilməsi, qeyri-neft sektorunun və regionların inkişafı sürətlənib. Nazir hesab edir ki, özəl bölmənin inkişafı üçün azad rəqabət və münbit investisiya mühiti yaradılıb. 

Qeyri-neft sektoru üzrə artım 9,7 faiz təşkil etməklə, ümumi daxili məhsulda payı artaraq 52,7 faizə çatıb. 

Ölkənin strateji valyuta ehtiyatları 46 milyard dollardır. Bu da xarici dövlət borcundan təxminən 10 dəfə çoxdur.

Ölkə iqtisadiyyatına yönəldilmiş investisiyaların həcmi 22.1 milyard ABŞ dolları olub, bundan 13.3 milyard daxili, 8.8 milyard isə xarici investisiya təşkil edib.

Nazirin sözlərinə görə, 2012-ci ildə 100-dək sənaye obyekti istismara verilib. Onların sırasında bərk məişət tullantılarının çeşidlənməsi və yandırılması zavodu da var. 90-dan artıq sənaye müəssisəsinin inşası davam etdirilir. Qeyri-neft sənayesində 7,8 faiz illik artım olub. 

Ölkədə sənaye və texnologiya parklarının yaradılması üzrə təşkilati işlər davam edir. İri miqyaslı su təchizatı, kanalizasiya, meliorasiya, yol-nəqliyyat infrastrukturu işləri görülür. Mustafayevin sözlərinə görə, 2012-ci ildə regionlarda 410 obyekt istismara verilib. 

Dövlətin təşəbbüsü ilə iki rayonda (Ağcabədi və Beyləqan) iri taxılçılıq təsərrüfatları yaradılıb. Növbəti addım olaraq Cəlilabad, Şamaxı və Hacıqabul rayonlarında belə təsərrüfatların yaradılması məqsədi ilə zəruri işlərə başlanılıb. 

Nazir ölkə iqtisadiyyatında olan bir mənfi təzahürdən belə danışmayıb, vətəndaşların və sahibkarların üzləşdiyi problemlərə toxunmayıb. --08D—