İlin əvvəlindən 208 hüquqi şəxs ləğv edilib

2013-cü ilin yanvar-iyun ayları ərzində Azərbaycanda 208 kommersiya hüquqi şəxs ləğv edilib. Bunun üçdə biri ticarət, nəqliyyat vasitələrinin təmiri müəssisəsidir, deyə Dövlətstatkomda Turan-a bildiriblər. 

İlin I yarısında 3 833 yeni şirkət yaranıb. İyulun 1-i üçün onların sayı 82 355-ə çatıb. Ötən ilin eyni dövrü ilə müqayisədə hüquqi şəxslərin sayı 4,3% artıb. Onların 54%-i Bakıda işləyəcək. 

Şirkətlərin çoxunu (3 337 və ya 87%) yerli investorlar yaradıb. 1 iyul 2013-cü il üçün 100% yerli kapitallı şirkətlərin sayı 65 278 olub. 

Bu il Vergilər Nazirliyi 100% xarici kapitallı 256 şirkət, filial, və nümayəndəlik qeydiyyata alıb. İyulun əvvəli üçün ölkədə 4625 belə şirkət olub. Əcnəbilər bu il Azərbaycanda yerli tərəfdaşlarla 80 müştərək müəssisə yaradıb. Hazırda ölkədə 1 535 MM var. DSK-nın məlumatına görə, MM-lərin və 100% xarici kapitallı şirkətlərin 31,7%-i Türkiyə, 9,9%-i Britaniya, 7,1%-i Rusiya, 5,5%-i İran, 4,2%-i ABŞ, 2,4Ⅶ-i Almaniya mənşəlidir.  

1755 yerli özünüidarə orqanı da hüquqi şəxslərə aiddir. 

Dövlət mülkiyyətində 9 162 müəssisə və təşkilat var. Bu il dövlət vəsaitləri ilə 148 müəssisə yaradılıb. 

Hüquqi şəxslərin strukturunda ticarət, nəqliyyat vasitələrinin təmiri müəssisələri üstünlük təşkil edir – 27,3% (22,5 min). Ardınca tikinti şirkətləri (9,1 min və ya 11,1%), kənd təsərrüfatı, meşə və balıq təsərrüfatı (9 min və ya 10,9%), emal sənayesi (5,3 min və ya 6,4%) gəlir. 08D