İnvestorlar hər dördüncü səhmdar cəmiyyətdən şikayət edib

Bu ilin 9 ayında Qiymətli Kağızlar üzrə Dövlət Komitəsinə 221 yazılı şikayət daxil olub (ötən ilin eyni dövrü ilə müqayisədə +39%).  Praktika göstərir ki, Azərbycanda investor hüquqlarının vəziyyəti pisləşir. 

İnvestorlar 411 SC-də hüquqlarının pozulmasından şikayət ediblər. Bu, səhmdar cəmiyyətlərin dörddə biri deməkdir. Şikayət edilən SC sayı ötən illə müqayisədə 50% artıb. Şikayətləri araşdıran QKDK 264 hüquqi şəxsə 200-300 manat inzibati sanksiya tətbiq edib. Ümumi cərimələr 35 min manat təşkil edib. Bu, ötən ilin eyni dövründəkindən 50% azdır. «Qiymətli kağızlar bazarında investor hüquqlarının qorunması haqqında» qanuna zidd olaraq QKDK 2005-ci ildən  investor hüquqlarını pozan SC-lərin siyahısını açıqlamır. 

Mülki Məcəllə və başqa normativ-hüquqi aktlara əsasən, SC-lərin illik hesabatı mətbuata açıqlanmalıdır. Paralel olaraq QKDK-yə hesabat verilir. Amma hətta QKDK-nın hesabatından görünür ki, bu tələbə əməl edilmir. Bu il oktyabrın 1-i üçün 398 SC QKDk-ya hesabat verib. Bu, ötən ilin eyni dövrü ilə müqayisədə 5% çoxdur. 

2012-ci ilin yanvarından ölkədə korporativ idarəetmə standartları qüvvədədir. O, şirkətlər üçün könüllüdür. Azərbaycanda korporativ idarəetmə və korporativ etika səviyyəsi çox aşağıdır. Nə İqtisadi İnkişaf Nazirliyi, nə də QKDK vəziyyəti dəyişmək üçün təsirli tədbirlər görmür. 08D