İqtisadçı: «Parabank»ın bank olmayan kredit təşkilatına transformasiyası prosesi qanunsuzdur»

İqtisadçı Əkrəm Həsənov “Parabank”ın transformasiyası prosesini qanunsuz adlandırıb. 2014-cü ilin iyulunda bankın lisenziyası ləğv olunaraq bank olmayan kredit təşkilatı lisenziyası verilib.

Turan məlumat verir ki, ekspert Facebook sosial şəbəkəsində öz profilində qeyd edib ki, “Parabank”ın ləğvi prosesi başa çatmayana qədər onun digər şirkətə, o cümlədən bank olmayan təşkilata transformasiyası mümkün deyil.

 “Adın dəyişdirilməsi üçün səhmdar cəmiyyətinin səhmdarlarının ümumi yığıncağı keçirilməlidir, bu isə mümkün deyil, çünki o, ləğv prosesindədir. Lisenziya da ləğv prosesində olan şəxsə verilə bilməz”, - Ə.Həsənov vurğulayıb.

 “Bank olmayan kredit təşkilatları haqqında” qanunun 25-ci maddəsinə əsasən ləğv olunan kredit təşkilatının lisenziyası da ləğv olunmalıdır. Bəs Palata bu lisenziyanı necə verib? Ümumiyyətlə, ləğv olunan hüquqi şəxsin adı necə dəyişdirilib? Faktiki ləğvi bitməmiş bank qeybə çəkilib. Dünya praktikasında hələ belə şey olmamışdı. Amma bizdə oldu”, - o yazıb.

Digər mühüm məsələ budur ki, “Parabank”da sığortalnmamış əmanətlər, hüquqi şəxslərin bank hesabları var, orada da qaytarılmamış pullar var. Əmanət qəbul etmək, bank hesabları aparmaq sırf bankın səlahiyyətidir. Bank olmayan kredit təşkilatı əmanət qəbul edə, bank hesabları aça, orada pul saxlaya bilməz. İndi isə belə çıxır ki, sözügedən bu təşkilat artıq bank olmasa da orada əmanətlər və bank hesabları var. Bu isə misli görünməmiş qanunsuzluqdur”, - ekspert vurğulayıb.

O qeyd edib ki, keçmiş “Parabank”ın sahibləri, təbii, bank olmayan kredit təşkilatı təsis edə bilərdi. Palata da ona lisenziya verə bilərdi.

“Amma bu başqa təşkilat olmalı idi. “Parabank” sonadək ləğv olunmalı və borcları qaytarılmalı idi. Əgər nəticədə əmlak qalsaydı, yeni yaradılmış təşkilata ötürülə bilərdi. Amma ləğv olunan bankın bazasında ləğv olunan bank olmayan kredit təşkilatının yaradılması nonsensdir və bunun hüquqi izahı yoxdur”, - Ə.Kərəmov bildirib.

Onun fikrincə, “Parabank”ın nəsə vacib əmlakı və başqa gizli məqamları var ki, sahibləri onu əldən buraxmaq istəmir, Palata da onlara nədənsə kömək edir.

Qeyd edək ki, Əmanətlərin Sığortalanması Fondunun məlumatına görə, dekabrın 19-u üçün “Parabank”ın əmanətçilərinə 42 mln. 907 min manat verilib ki, bu da sığortalanmış əmanətlərin 98%-ni təşkil edir.71D