İqtisadi Tədqiqatlar Mərkəzinin müsabiqəsi başlayır

İqtisadi Tədqiqatlar Mərkəzi torpaqların deqradasiyasının təbii və antropogen amillərin araşdırılmasında və bu sahədə maarifçilik və ictimai nəzarətdə maraqlıdır. Bu mövzu ilə bağlı ATƏT-in Bakı ofisinin maliyyə dəstəyi ilə ən yaxşı jurnalist işi üçün müsabiqə edilan edib. Müsabiqə torpaqların münbitliyinin qorunması, eroziyanın, deqradasiyanın, şoranlaşmanın, çirklənmənin qarşısının alınması, onların mühafizəsi, fermerlərin əkinçiliklə məşğul olduğu zaman torpaqqoruyucu texnologiyadan istifadəsinə yardım etmək, bu sahədə problemləri aktuallaşdırmaq və ictimailəşdirmək məqsədi ilə keçirilir. İTM icraçı direktoru Qalib Toğrulun fikrincə, problem aktualdır və ictimai əhəmiyyətlidir.
Müsabiqəyə təklif edilən işlər elan olunmuş mövzunun ən azı bir istiqamətini (şoranlaşma, eroziya, deqradasiya, şorakətləşmə, çirklənmə və sair) əhatə etməlidir. Məqalədə bu istiqamətdə görülmüş fəaliyyətlər araşdırılmalı, faktlardan istifadə olunmaqla onların yetərliliyi və ya yetərsizliyi əsaslandırılmalıdır. Məqalə Azərbaycanın konkret bir bölgəsinin və ya rayonun problemindən bəhs etməli, reallığa əsaslanmalıdır. Müsabiqədə bir jurnalist yalnız bir məqalə ilə iştirak edə bilər. Məqalənin sonunda mütləq “Yazı İqtisadi Tədqiqatlar Mərkəzinin ATƏT-in Bakı ofisinin maliyyə dəstəyi ilə həyata keçirdiyi “Torpaqların deqradasiyasının təbii və antropogen amilləri: maarifləndirmə və ictimai nəzarət” layihəsi çərçivəsində elan etdiyi müsabiqəyə təqdim olunur” qeydi verilməlidir.
Müsabiqəyə təqdim olunan yazılar 1 iyul 2012-ci ildən 1 oktyabr 2012-ci ilə qədər kütləvi informasiya vasitələrinin (qəzet, jurnal, sayt) birində Azərbaycan və ya rus dillərində dərc olunmalıdır. Məqalə 11 min işarədən çox olmamalıdır. Məqalə elektron formada, Times New Roman şrifti ilə (qəzet və jurnallarda dərc olunan məqalənin surəti, saytın isə linki əlavə edilməklə) ən geci 5 oktyabra qədər İqtisadi Tədqiqatlar Mərkəzinin e-mail ünvanına (office@erc.az) göndərilməlidir.
Müsabiqəyə təqdim olunan məqalələrdən ən yaxşı 3 yazı aşağıdakı qaydada mükafatlandırılacaq: I yer - 300 manat, II yer - 250 manat, III yer - 150 manat.
Nominantlara İTM-in diplomu veriləcək.