Kakagəldi Abdıllayev Azərbaycanı Beynəlxalq Məhkəmə ilə hədələyir

Bakının Xəzər dənizindəki “Kəpəz” yatağına iddiasına görə rəsmi Aşqabad öz nazirinin dili ilə Azərbaycanı beynəlxalq məhkəmə ilə hədələyib.  

Türkmənistanın mövqeyini “Türkmən” dövlət xəbərləri agentliyi vasitəsilə iyunun 29-da neft-qaz sənayesi naziri Kakagəldi Abdıllayev çatdırıb.

O bildirib ki, 2008-ci ildə Türkmənistan prezidenti Qurbanqulı Berdımuhammədovun Azərbaycana səfəri zamanı iki ölkə heç biz saziş imzalamayıb.  Eyni zamanda Türkmənistan mübahisəli məsələnin həlli məqsədilə təşəbbüs irəli sürüb. “Təəssüf ki, bu təşəbbüslər Azərbaycan tərəfindən qəbul olunmayıb”, - türkmənistanlı nazir vurğulayıb.

O həmçinin diqqəti ona yönəldib ki, Türkmənistan dəfələrlə Azərbaycana müraciət edərək dənizin yurisdiksiyası müəyyən  edilməyən ərazilərində, məhz “Ömər” və “Osman” yataqlarında (“Azəri” və “Çıraq” – Azərbaycan) işləri dayandırmağı tələb edib.

“Azərbaycan tərəfi mübahisəli ərazilərdə öz qanunsuz hərəkətlərini gizlətməyə cəhd edərək ilkin razılaşmanı pozur, eyni zamanda özünü haqlı göstərməyə çalışır”, - K. Abdıllayev vurğulayıb.

“Yaranmış vəziyyətdə Türkmənistanın BMT Beynəlxalq Məhkəməsinə müraciət etməkdən başqa yolu qalmır, - o bildirib.

Xatırladaq ki, iki həftə əvvəl Türkmənistanın geoloji kəşfiyyat gəmisi “Kəpəz” yatağı ərazisində iş apararkən Azərbaycanın sərhəd gəmisi tərəfindən oradan kənarlaşdırılıb.

Bu yataq Azərbaycan və Türkmənistanın dəniz sərhədlərinin qovuşuğunda yerləşir və iki ölkə arasında çoxdandır ki, mübahisə predmetidir. Bakı Aşqabada “Kəpəz” yatağının birlikdə işlənməsini təklif edib. Lakin Aşqabad onu, həmçinin Azərbaycanın 1994-cü ildən işlədiyi “Azəri-Çıraq-Günəşli” yataqlarını özününkü sayır. -02D-