Kiçik biznesmenlərin vəziyyəti necədir?

Bu gün Park İNN otelində Kiçik və Orta Müəssisələrin İnkişafına Yardım Mərkəzi (KOMİYM) Sahibkarlığın və Bazar İqtisadiyyatın İnkişafına Yardım Fondu (SBİİYF) ilə birgə yerli kiçik biznesmenlər arasında sorğunun nəticələrini təqdim edib. Tədbir USAİD-in dəstəyi ilə həyata keçirilən Azərbaycanda kiçik sahibkarlığın inkişafına kömək” layihəsi çərçivəsində baş tutub. 

KOMİYM sədri İlkin Qarayevin sözlərinə görə, sorğu 7 mart-17 apreldə Bakı, Gəncə, Sumqayıt və 17 rayonda 1 min biznesmen arasında keçirilib. İştirakçıların 9,2%-i hüquqi, qalanları fiziki şəxsdir. 30% ticarət, bir o qədər xidmət, hərəyə 20% istehsalçı və kəndlilərdir. 

Respondentlərə 47 sual verilib. Məqsəd kiçik sahibkarlığa əngəllərin aşkarlanmasıdır. Mütəxəssisləri qanunlardan məlumatlılıq, vergi və gömrük işçilərinə münasibət, bu sahənin inkişafı üzrə rəylər də maraqlandırıb. 

Anonimliyə baxmayaraq, respondentlərin çoxu ehtiyatlılığa üstünlük verib. 41% hesab edir ki, onların fəaliyyət sahəsində köklü dəyişiklik yoxdur. Biznesmenləri vergi inspeksiyası ilə yanaşı DİN, bəzən MTN və İcra Hakimiyyəti nümayəndələri də “yoluxur”. Kiçik müddətli lisenziyaların alınmaıs çox vaxt aparır. 

Ən çox əngəl yaradan dövlət təşkilatları, çoxlu kağızlar, arayış verilməsinin müxtəlif şərhidir. 35,8% daşınmaz əmlakın qeydiyyatında çətinliklərlə üzləşir. 

1 min respondentdən 181-i SKMF-yə düzgün müraciət edib, 111-i güzəştli kredit alıb. 

Kiçik sahibkarlar vergi dərəcəsinin azaldılmasını, elektron xidmətə çıxış səviyyəsinin artırılmasını, qanunvericiliyin TV-lər və İnternet vasitəsilə geniş təbliğini arzu edir. Gömrük proseduru sadələşdirilsə və həcmi azalsa, yaxşı olar, deyə onlar düşünür. --17D—