Hilal Məmmədovun məhkəməsində şahid ifadə verməkdən yayınır

Bu gün “Tolışi sado” qəzetinin redaktoru Hilal Məmmədovun işi üzrə məhkəmə dinləmələri növbəti dəfə təxirə salınıb. Bakı Ağır Cinayətlər Məhkəməsində iclasın başqa vaxta keçirilməsinə şahidin iştirak etməməsi səbəb olub.

Şahid ifadələri iyulun 10-na təyin edilmişdi, lakin məlum olub ki, onlardan biri – Əziz Ağakişiyev 2012-ci ilin dekabrında vəfat edib. İkinci şahid Ülfət Abbasov məhkəməyə gəlməyib. İclas iyulun 17-nə keçirilib. Lakin şahid yenidən gəlməyib və hakim onun məcburi qaydada gətirilməsi barədə qərar çıxarıb.

Bu gün prosesə sədrlik edən hakim Azər  Orucov bildirib ki, polis onun gəlişini təmin edə bilməyib, cünki sözügedən şəxs Novosibirskdədir.

Öz növbəsində H.Məmmədov Ə.Ağakişiyevin ölüm, Ü. Abbasovun isə gediş şəraitinin araşdırılması ilə bağlı vəsatət qaldırıb.

H.Məmmədov istisna etmir ki, Ə.Ağakişiyevi “aradan götürüblər”, Ü.Abbasov isə ölkəni tərk etməyə məcbur olub. “Onlar mənə qarşı yalan ifadə vermək istəməyiblər”, - H.Məmmədov bildriib.

Vəkil Ramiz Məmmədov Nizami rayon polisinin müstəntiqi Ceyhun Kərimovun şahid kimi çağırılması barədə yenidən vəsatət qaldırıb. Müdafiə tərəfinin H.Məmmədovun mənzilində axtarış zamanı yol verilən pozuntular və şahidlərlərlə bağlı ona sualları var. 

İkinci vəkil Cavad Cavadlı guya H.Məmmədovda aşkar edilmiş narkotik maddə paketlərinə toxunanların şəxsiyyətinin müəyyən edilməsi üçün daktiloskopik ekspertizanın aparılması barədə vəsatət qaldırıb.

Hakim bildirib ki, vəsatətə iyulun 31-də növbəti iclasda baxılacaq.

* Hilal Məmmədov 2012-ci il iyunun 21-də həbs olunub. O, qanunsuz narkotik maddə saxlamaqda, dövlətə xəyanətdə, milli ədavətin qızışdırılmasında ittiham olunur. Lakin yerli və beynəlxalq təşkilatlar H.Məmmədovun siyasi motivlərlə təqib olunduğunu hesab edirlər. —16C06—