Kişinyovda MDB üzv dövlətlərinin qiymətli kağızlar bazarının tənzimlənməsi müzakirə edilib

Müstəqil Dövlətlər Birliyinə (MDB) üzv dövlətlərinin qiymətli kağızlar bazarının tənzimlənməsi üzrə dövlət orqanlarının rəhbərləri Şurası ötən həftə Kişinyovda toplaşıb. Bazar infrastrukturu və təklif edilən maliyyə alətləri üzrə tərəfdaşlardan geri qalan Azərbaycanı Qiymətli Kağızlar üzrə Dövlət Komitəsinin (QKDK) sədr müavini İlqar Muradov təmsil edib. 

QKDK ictimaiyyətlə əlaqələr sektorunda Turan-a bildiriblər ki, XVI-XVII iclaslarda əsas müzakirə predmeti qiymətli kağızlar bazarını tənzimləyici dövlət orqanları arasında birgə əməkdaşlıq münasibətlərinin genişləndirilməsi və bazarın tənzimlənməsində qabaqcıl beynəlxalq standartların tətbiqi olub. 

Azərbaycan son dəfə qiymətli kağızlar bazarı üzrə qanunvericiliyə 2004-cü ildə dəyişiklik edib. Qiymətli kağızlar bazarının tənzimlənməsi, korporativ idarəetmənin təkmilləşdirilməsi, QK bazarında hüquq pozuntuları ilə mübarizənin gücləndirilməsi üzrə qanun layihələri hazırlanıb. Amma bu il parlamentin gündəliyində bu sənədlər yoxdur. 

Moldova KİV-i xəbər verir ki, iclasın gedişində MDB ölkələri üzrə QK bazarının tənzimlənməsi üzrə qanunvericiliyin müqayisəli analizi aparılıb. Həmçinin tez-tez təkrarlanan pozuntular açıqlanıb. Qiymətli kağızlar bazarının tənzimlənməsi praktikası təhlil olunub. Həmçinin MDB ölkələrinin digər bilik ölkələrində qiymətli kağızlar yerləşdirməsi təcrübəsi müzakirə edilib. 

Moldova bu iclas üçün MDB ölkələri üzrə QK bazarının tənzimlənməsi üzrə qanunvericiliyin müqayisəli analizini, həmçinin korporativ idarəetmə məcəlləsi üzrə qanunvericiliyin analizini və onun həyata keçirilməsi metodlarını hazırlayıb. 08D