Kreditləşmədə vaxtı keçmiş kreditlərin xüsusi çəkisi 1,5% azalıb, kreditləşmə həcmi 30% artıb

2013-cü ilin noyabrında ölkə iqtisadiyyatına kredit qoyuluşunun qalığı 253,9 mln manat və ya 1,7% artaraq 15245,3 mln manat olub.

Azərbaycan Mərkəzi Bankının məlumatına görə, son 12 ayda kreditləşmədə artım 3514,8 mln manat və ya 30% olub. Vaxtı keçmiş kreditlərin kreditləşmənin ümumi həcmində xüsusi çəkisi 1 dekabr üçün 5,2% təşkil edib. Bir il əvvəl o, 6,6% idi. 

Qısamüddətli kreditlər il ərzində 182,3 mln manat və ya 5,6%, uzunmüddətlilər 3332,6 mln manat və ya 39,2% artıb. Sonuncuların qalığı 11825,9 mln manat olub. Uzunmüddətli kreditlərin xüsusi çəkisi 77,6% təşkil edib (bir il əvvəl 72,4%). 

Kredit qoyuluşunun ümumi həcmində özəl bankların payı 62,9%, Beynəlxalq Bankın payı 34,2% olub. Qalan 2,9% qeyri-bank kredit təşkilatlarının payına düşüb. 

Banklar tərəfindən iqtisadiyyatın real sektoruna bütün kreditlərin 98,26%-i, maliyyə sektoruna 1,74%-i yönəldilib. 1 dekabr 2013-cü il üçün fiziki şəxslərə 6035,2 mln manat və ya  ümumi göstəricinin 39,6%-i, xidmət və ticarət sahəsinə 2243,8 mln manat və ya 14,7%, energetika və təbii ehtiyatlara 299,2 mln manat və ya 2,0%, tikinti və əmlak sahəsinə 2360,4 mln manat və ya 15,5%, sənaye və istehsala 1461,2 mln manat və ya 9,6%, nəqliyyat və rabitəyə 500,9 mln manat və ya 3,3%, kənd təsərrüfatı və emala 734,1 mln manat və ya 4,8% və s. kredit verilib.

Xarici valyuta ilə kredit payı 28,3% olub. Ötən ilin müvafiq tarixi üçün iqtisadiyyatın xarici valyuta ilə kreditləşməsinin payı 31,7% idi. 

Kredit qoyuluşunun 86,7%-i Bakının payına düşüb. Vaxtı keçmiş kreditlərin 85,2%-i də paytaxtın hesabındadır. Ölkə üzrə orta kredit dərəcəsi 14,2% olub. --15В--