Uğurlu əmtəə nişanı yeni şirkətin adına çevrilib

“Dəvəçi Broyler” ASC-nin 15 yanvardakı ümumi yığıbcağının qərarı ilə “Səba” əmtəə nişanı şirkətin yeni adına çevrilib. 

Şirkətdə Turan-a deyiblər ki, səhmdarlar bütün törəmələrin (“Dəvəçi Broyler Dərin Emal”, “Biləsuvar Aqro”, “Qarabağ Taxıl”, “Qarabağ Toxum” və “Baki Fud Kompani”) ana şirkətə birləşməsini istəyib. Şirkət onlarda 100% paya malikdir. Bununla bağlı nizamnaməyə dəyişiklik edilib. 

“Dəvəçi Broyler” ASC-də pay iştirakı 14 səhmdar, o cümlədən “Azərbaycan İnvestisiya Şirkəti ” – 10%, “Baku İnvestment Company” MMC – 37,31% arasında bölünüb.  

“Dəvəçi Broyler” ASC şirkətlər qrupu yem, broyler quşları və yarımfabrikatlar istehsalı müəssisələri “Al-Chicken” restoranı və “Sebalı” köşklərindən ibarət şəbəkədir. Broyler fabrikinin gücü ildə 13 min ton, ölkədə quş ətinə tələbat 95 min tondur. 

“Dəvəçi Broyler” ASC 1996-cı ildə Şabran broyler fabrikinin bazasında yaradılıb. 1997-ci ildə özəlləşəndən sonra 2002-ci ildə istehsal bərpa edilib. O, 135 ha sahə tutur. 90 tikilisi var. “Biləsuvar Aqro” sutkada 100 ton süd emal edir. “Qarabağ Taxıl” MMC-nin 5600 ha torpağında buğda, qarğıdalı və s. yetişdirilir.