Londonda ABB-nin dəstəyi ilə Xəzər Dəhlizinin inkişafl müzakirə edilir

Noyabrın 26-da Londonda Lancaster House-da I “Xəzər Dəhlizi” (Caspian Corridor Conference) konfransı keçirilir. Tədbir dünyada ən yüksək iqtisadi artım tempi olan regionlardan biri kimi Xəzər dəhlizinə həsr edilib. Konfransı CityUK Azərbaycan Beynəlxalq Bankı (ABB) və Asia House-la birgə hazırlayıb. 

ABB-nin məlumatında deyilir ki, konfransın işində keçmiş ticarət naziri Baronessa Saymons, Beynəlxalq Starteji Araşdırmalar Mərkəzinin (IISS) baş direktoru Con Çipman, biznes, innovasiya və vərdişlər naziri (DBIS) Lord Marland, Qiymətli Kağızlar üzrə Dövlət Komitəsinin sədri Rüfət Aslanlı, energetika üzrə ekspert Deniel Ergin, Azərbaycanın Böyük Britaniyadakı səfiri Fəxrəddin Qurbanov, ABB İH sədri Cahangir Hacıyev ARDNŞ vitse-prezidenti Rəfiqə Hüseynzadə və başqaları iştirak edir. 

Onlar regionun problemlərini və ticarət və innovasiya potensialını, o cümlədən infrastruktur, eneregtika və bank sektoru məsələlərini müzakirə edəcəklər. Təhsil üzrə keçmiş dövlət katibi Çarlz Klarkın və tennis əfsanəsi Boris Bekkerin iştirak etdiyi panel Xəzər dəhlizi ölkələrində idman və təhsilə həsr ediləcək. 

Konfransın keçirilməsinə səbəb Xəzər dəhlizinin dünyada sürətlə inkişaf edən iqtisadi zonalardan biri olmasıdır. Neft və qaz ixracatçılarını (Azərbaycan, Qazaxıstan, Türkmənistan və Özbəkistan) və ixracatçı olmayanları (Gürcüstan, Qırğızıstan və Tacikistan) əhatə edən enerji dəhlizi sayəsində burada davamlı ÜDM artımı, proqnozlara əsasən, yaxın illərdə 5-7% olacaq. 

Konfransdan sonra bütün qonaqlar ABB-nin 20 illiyinə həsr edilmiş Azərbaycan musiqisi gecəsinə dəvət edilib. Kral Filarmoniyası orkestrinin ifasında Yalçın Adıgözəlovun dirijirluğu ilə Fikrət Əmirovun musiqisi və muğamlar səsləndiriləcək. –15D--