Mərkəzi Bank uçot dərəcəsini artırmayıb

Mərkəzi Bankın İdarə Heyəti uçot dərəcəsinin 15% səviyyəsində saxlanması barədə qərar qəbul edib. 

Məlumatda deyilir ki, qərar makroiqtisadi sferada müşahidə olunan ilkin müsbət trendləri və formalaşan yeni gözləntiləri nəzərə alaraq qəbul edilib.

İclasda son makroiqtisadi proseslər, inflyasiyaya təsir edən amillər, bu amillərin idarə olunması üçün görülən tədbirlər və pul siyasətinin reallaşmasının gedişi müzakirə olunub.

Mərkəzi Bankın İdarə Heyəti hesab edir ki, yeni valyuta hərracı mexanizminin tətbiqi, xarici valyutanın nağd və qeyri-nağd satış məzənnəsinə rəsmi məzənnəyə nəzərən qoyulmuş limitin aradan götürülməsi valyuta bazarına tarazlaşdırıcı təsir göstərib.

Qeyd olunan proseslər fonunda 2017-ci ilin fevral ayında əvvəlki aya nisbətən inflyasiya templərinin azalması müşahidə olunub.

Mərkəzi Bankda əmindirlər ki, qəbul edilmiş makroiqtisadi siyasət çərçivəsinin tətbiqinin effektivliyindən, tədiyə balansında və valyuta bazarında müsbət trendlərin davam etməsindən asılı olaraq ilin sonuna birrəqəmli inflyasiya səviyyəsinə nail olmaq imkanları yaranb. 71D