Mobil telefonlarla yol hərəkətini izləmək mümkün olacaq

Nəqliyyatı İntellektual İdarəetmə Mərkəzi (NİİM) sərnişinlərin və sürücülərin yollardakı hərəkətini rahatlaşdırmaq məqsədilə mobil telefonlar üçün proqram təminatını istifadəyə verib. Belə ki, tətbiqi mobil telefona yükləmiş istifadəçi real vaxtda Bakının avtomobil yollarının vəziyyəti, paytaxtdakı avtobuslar, təmir-tikinti işləri aparılan yollar haqqında, elanlar və digər məlumatlar əldə edə bilər.

Mobil tətbiqi pulsuzdur və istifadəyə verilib. Hazırda bu, iPhone 3GS, iPhone 4, iPhone 4S, iPhone 5, iPod touch (3-cü nəsil), iPod touch (4-cü nəsil), iPod touch (5-ci nəsil) və iPad iOS 4.3 qurğuları tərəfindən dəstəklənir. Tətbiq həmçinin iPhone5 üçün də uyğunlaşdırılıb.

NİİM-dən Turan-a verilən məlumata görə, daha sadə mobil telefonların proqram təminatı üzrə iş aparılır.

Proqram təminatını mobil telefona və ya digər mobil qurğulara yükləməklə istifadəçi hərəkətin intensivliyi ilə tanışlıq üçün Bakı şəhərinin yol xəritəsinə çıxış imkanları əldə edə bilər ki, bu da optimal hərəkət marşrutunun seçimini asanlaşdırar. Sərnişinlər real vaxt rejimində avtobusların hərəkətini izləmək imkanları əldə ediblər. Hazırda onlar olduqları yerdən çıxmadan avtobusların istənilən dayanacağa çatma vaxtı ilə bağlı dəqiq məlumat ala bilərlər ki, bu da vaxta qənaət olunmasına imkan verir. 

Tətbiqi aşağıdakı linkdən yükləmək mümkündür:

https://itunes.apple.com/az/app/baku-its/id587351186?mt=8

Bakı şəhərində nəqliyyatı intellektual idarəetmə sistemi 2011-ci ilin dekabrından tətbiq edilir. Bu sistem dövlətə $100 mln.-a başa gəlib.  -08B