Moskvada olduğu bir gün üçün Azərbaycanın baş naziri $504 ezamiyyə pulu alacaq

Baş nazir Artur Rasizadə 26 fevralda qərar imzalayaraq, xaricdə olduğu müddət üçün maaşa ezamiyyə əlavəsini iki dəfə artırıb. İndi o, Moskvada olduğu bir gün üçün $504 ezamiyyə pulu alacaq. Milli Məclis sədri və Konstitusiya Məhkəməsinin sədri də belə imtiyaz əldə edib. 

"Ezamiyyə xərclərinin normaları haqqında" Azərbaycan Respublikası Nazirlər Kabinetinin 2008-ci il 25 yanvar tarixli 14 nömrəli qərarında dəyişikliklər edilməsi barədə qərar rəhbər işçilərin kateqoriyasına uyğun olaraq ezamiyyə xərclərinə 1 günlük əlavələrin tətbiqini  nəzərdə tutur. 

Yuxarı eşelon rəhbərləri, nazirlər, dövlət komitəsi sədrləri, mərkəzi icra hakimiyyəti orqan-larının rəhbərləri, baş nazirin müavinləri, deputatlar, MSK sədri, ombudsman, baş prokuror və s. ezamiyyəyə 50% əlavə əldə edəcək. Hesablama Palatasının sədr müavinləri və auditorları 30% əlavəyə layiq görülüb. Bakı Şəhər İcra Hakimiyyəti başçısı 50% əlavə vəsait alacaq. Paytaxt meri və başqa icra hakimiyyəti başçıları siyahıya düşməyib.  

Maraqlıdır ki, düzəlişə qədər mərkəzi icra hakimiyyəti orqanları rəhbərlərinin müavinləri, məhkəmə orqanı işçiləri 30%, xaricdə dövlət və hökumət tədbirlərinə iştirak edən başqa şəxslər 25% əlavə alırdı. Yeni redaksiyada bu kateqoriyanın əlavə qrafası boş qalıb. 

Bundan başqa, 100% və 50% ezamiyyə əlavəsi alanlar təyyarədə biznes-klas, ən pisi iki erlik kupedə yer ala bilər. 

Qeyd edək ki, hər ölkə üzrə Nazirlər Kabineti müəyyən ezamiyyə ödənişi müəyyən edib. Orta göstərici gündə $150-dır. Nyu-York istisna təşkil edir. Burda bir sutka üçün $330 ezamiyyə hesablanır.  

Ezamiyyə xərclərinə yaşayış yeri (o cümlədən oteldə qalma), yemək, nəqliyyat və başqa xərclər daxildir.—08B—