Mükafat portfelinin şaxələnməsi "Xalq Sığorta"nı gücləndirib

"Xalq Sığorta" şirkəti ötən il 12 mln 583,47 min manat mükafat yığıb və sığortaçılar arasında 11-ci olub. 

Bunun 10 mln 947,55 min manatı (87%) könüllü növlər üzrədir. 

İnişil cəmi 8 mln 969,3 min manat mükafat yığılmışdı və bunun 1,2%-i icbari növlər üzrə idi. 

3,5 mln artımın bir neçə səbəbi var. Birincisi, İcbari Sığorta Bürosuna üzvlükdür. Bu, təkcə avtonəqliyyat vasitələri sahiblərinin mülki məsuliyyətinin icbari sığortası (yeni AVSMMİS) üzrə milyon yarım təmin edib. 

Yük sığortasından şirkət bir milyon manat əldə edib. Avtomobillərin КАСКО sığortasında artım yarım milyon olub. Su nəqliyyatının sığortası üzrə azalma (mənfi 450 min) olub, amma su nəqliyyatı vasitələri sahiblərinin mülki məsuliyyətinin sığortası üzrə 800 min mükafat olub. 

"Xalq Sığorta"da Turan-a deyiblər ki, ötən il daha çox mükafat könüllü tibbi sığorta üzrə olub - 4 mln 249,16 min manat. Bu, könüllü mükafatların 38,8%-dir. 

Ardınca avtomobillərin КАСКО sığortası - 2 mln 90,04 min manat, əmlakın yanğından və başqa risklərdən sığortası - 1 mln 432,73 min manat, bədbəxt hadisə və xəstəliklərdən sığorta - 710,27 min manat, su nəqliyyatının sığortası - 253,37 min və su nəqliyyatı vasitələri sahiblərinin mülki məsuliyyətinin sığortası (yeni növ) gəlir - 795,05 min manat. 

Ümumi mülki məsuliyyətin sığortası şirkətə 198,04 min manat, yük sığortası 1 mln 212,99 min manat, işə götürənlərin məsuliyyətinin sığortası 5,89 min manat gətirib. Könüllü növlər şirkətə 10 mln 947,55 manat təmin edib. 

İcbari növlər üzrə 1 mln 635,92 min manat (2011-ci ildən 12,5 dəfə çox) yığılıb. Bunun 133,42 min manatı daşınmaz əmlakın icbari sığortası, 7,1 min manat daşınmaz əmlakın istismarı zamanı mülki məsuliyyətin icbari sığortası üzrədir. Yeni AVSMMİS üzrə daha çox (1,49 mln manat) mükafat olub. 

Şirkətin ödənişləri 2 mln 233,21 min manat, o cümlədən könüllü növlər üzrə 2,11 mln, icbari növlər üzrə 126,51 min manat olub. 2011-ci ildə nisbətən çox - 2 mln 571,47 mln manat kompensasiya edilib. 

KTS ödənişlərdə birincidir -  1 mln 200,64 min manat. Avtomobillərin КАСКО sığortası üzrə 800,74 min manat ödəniş olub.

İcbari növlər üzrə 107,64 min manat ödənişin hamısı avtonəqliyyat vasitələri sahiblərinin mülki məsuliyyətinin sığortası üzrədir. 

  «Xalq Sığorta» yerli sığorta bazarında 2005-ci ildən fəaliyyət göstərir. Gəncə, Zaqatala və Sumqayıtda filialları olan şirkət 22 könüllü, 4 icbari sığorta növü üzrə xidmət göstərir. 2010-cu ildə müddətsiz lisenziya alıb. 2011-ci ildən İcbari Sığorta Bürosunun üzvüdür. Nizamnamə kapitalı 26 mln 382 min manatdır. Bu, yerli bazarda üçüncü göstəricidir. --17D-